«ЖАСЫЛ ҚАҚПА» ТАБИҒАТҚА ТАҒЗЫМ
«Бір жылдығын ойлаған халық бидай егеді, жүз жылдығын ойлаған халық ағаш егеді» дейді дана халқымыз. Расында, бүгін отырғызылған әрбір көшет – ертеңгі жасыл болашақтың кепілі. Табиғатты аялау, туған жердің тазалығын сақтау – баршамыздың ортақ міндетіміз.
Осындай ізгі бастаманың жарқын көрінісі ретінде Кеген өңірінде «Жасыл қақпа» атты ауқымды экологиялық жоба жүзеге асты. Шараның ашылу салтанатында аудан әкімі Нұрбақыт Теңізбаев, аудан прокуроры Алмат Данилов, Алматы облысының жастар саясаты мәселелері жөніндегі басқарма басшысының орынбасары Жақан Еркебұлан сөз сөйлеп, игі істің маңыздылығына тоқталды.
Ал ақсақалдар атынан Кеген ауданының Құрметті азаматы Рахым ақсақал ақ батасын беріп, көпшілікке ізгі тілегін арнады.
Бірлік мерекесі қарсаңында Кеген ауылының кіреберіс бөлігінде «Таза Қазақстан» республикалық экологиялық акциясы мен халықаралық «Парктер шеруі – 2026» табиғат қорғау қозғалысы аясында кең көлемді ағаш егу шарасы жоғары деңгейде ұйымдастырылып, өтті. Бұл күн Кеген өңірінің экологиялық тарихында ерекше мәнге ие болып, табиғатқа тағзым мен болашаққа сенім ұштасқан тағылымды сәт ретінде есте қалды.
Аталған шара – жай ғана көшет отырғызу емес, өңірдің экологиялық ахуалын жақсартуға, табиғи әлеуетін арттыруға және елді- мекеннің келбетін жаңғыртуға бағытталған кешенді жоба. Кеген ауылының босағасынан бастау алған «Жасыл қақпа»– табиғат пен адам үйлесімінің символына айналды.
Іс-шараға облыстық және аудандық деңгейдегі басшылар, қоғам қайраткерлері мен депутаттар, жергілікті тұрғындар, белсенді жастар, еріктілер, бұқаралық ақпарат құралдарының өкілдері мен блогерлер қатысып, бір мақсат жолында жұмыла еңбек етті. Мыңға жуық адамның қатысуы– ел бірлігінің, ортақ іске деген жауапкершіліктің айқын дәлелі болды.
Ауқымды шара барысында бір күн ішінде 5100 түп ағаш отырғызылды. Оның ішінде аққайың, қарағай, шырша, терек және қара ағаш секілді түрлі көшеттер бар. Арнайы дайындалған 7 гектар аумақ қоршалып, 2560 түп ағаш егілетін негізгі бөлігі жүйелі түрде көгалдандырылды. Сонымен қатар, жасыл желектің өсіп-өнуін қамтамасыз ету үшін 2000 метрлік суғару жүйесінің негізі қаланды.
Жобаның жүзеге асуына жеке сектор да белсенді атсалысты. Өңірде жүн мен тері өңдеу зауытын салып жатқан «MERGEN HOLDING» ЖШС әлеуметтік жауапкершілік танытып, 2 гектар жерге 2000 түп калифорния терегін отырғызу жұмыстарын қолға алды.
Айта кету керек, «Парктер шеруі» халықаралық қозғалысы 1996 жылдан бері табиғатты қорғау ісіне жұртшылықтың назарын аударып келеді. Кеген өңірі де бұл бастаманы қолдап, «Таза өлке», «Таза аймақ», «Жасыл жапырақ» секілді акцияларды тұрақты түрде өткізіп келеді.
Бүгінде Кеген ауылының кіреберісінде бой көтерген «Жасыл қақпа» – тек жасыл алқап емес. Ол – туған жерге деген сүйіспеншіліктің, табиғатқа деген құрметтің және келешекке деген сенімнің белгісі.
Кегеннің «Жасыл қақпасы» – бүгінгі еңбектің, ертеңгі жарқын болашақтың нышаны болмақ.
Лаура Қарасартова,
фото Мира Мұраталиева.
