Референдум – ел болашағына бастар маңызды қадам
Референдум – ел болашағына бастар маңызды қадам
Ел өміріндегі саяси маңызы зор оқиғалардың бірі – Конституциялық референдум. Бұл – халықтың өз еркін білдіріп, мемлекет дамуының стратегиялық бағытын айқындауға тікелей қатысатын маңызды тетік. Осыған орай 15 наурыз күні өтетін Конституциялық референдумға байланысты аудан көлемінде түсіндіру және ақпараттандыру жұмыстары жүйелі түрде жүргізілуде.
Аталған маңызды науқан аясында аудан әкімдігінің үлкен мәжіліс залында кеңейтілген жиын өтті. Жиынға мекеме басшылары, ауылдық округ әкімдері, салалық бөлім жетекшілері мен тиісті мамандар қатысты. Басқосуда референдумның маңыздылығы, оның өткізілу тәртібі және халық арасында ақпараттық-түсіндіру жұмыстарын сапалы ұйымдастыру мәселелері жан-жақты талқыланды.
Жиында аудан әкімінің орынбасары Кеңес Күнесбайұлы баяндама жасап, алдағы референдумның ел дамуындағы орны мен мәніне тоқталды. Ол өз сөзінде референдум – халық билігінің айқын көрінісі екенін атап өтіп, әрбір азаматтың саналы таңдауы мемлекет болашағына тікелей әсер ететінін жеткізді. Сондай-ақ, ақпараттық жұмыстардың мазмұнды, нақты әрі қолжетімді болуы аса маңызды екеніне назар аударды. Кеңес Күнесбайұлы халықты ақпараттандыру деңгейін нақтылап, бұл бағыттағы жұмыстардың әлі де жүйелі жалғасуы керектігін айтты. Әсіресе, шалғай елді мекен тұрғындарына толыққанды әрі түсінікті ақпарат жеткізу, тұрғындардың сұрақтарына нақты жауап беру, заңнамалық өзгерістердің мәнін қарапайым тілмен түсіндіру қажеттігі баса айтылды.
Жиын барысында тиісті мамандарға бірқатар нақты тапсырмалар жүктелді. Ауылдық округтерде кездесулер ұйымдастыру, бұқаралық ақпарат құралдары мен әлеуметтік желілер арқылы түсіндіру жұмыстарын күшейту, еңбек ұжымдарында арнайы жиындар өткізу міндеттелді. Сонымен қатар ақпараттың ресми дереккөздерге сүйене отырып таратылуы, жалған мәліметтердің алдын алу мәселесі де күн тәртібінен түскен жоқ.
Референдум – елдің саяси мәдениетінің көрсеткіші. Ол – азаматтардың қоғамдық-саяси өмірге белсенді араласуының айғағы. Сондықтан әрбір тұрғынның өз таңдауына жауапкершілікпен қарауы – уақыт талабы.Мұндай мазмұнды жиындар халықтың құқықтық сауаттылығын арттырып, қоғамда ашықтық пен сенім атмосферасын қалыптастыруға ықпал етеді. Аудан көлемінде жүргізіліп жатқан жүйелі ақпараттандыру жұмыстары алдағы референдумның жоғары деңгейде өтуіне негіз болмақ.
Ел болашағына бейжай қарамайтын әрбір азамат үшін 15 наурыз – маңызды күн. Өйткені референдум – халық үнінің айқын көрінісі, ортақ мүдденің тоғысқан тұсы болмақ.
Лаура Қарасартова
