Спорт – ұлт саулығының тірегі
«Денсаулық фестивалі – 2026»
Лаура Мұхаметқали, Суреттерді түсірген: Мира МУРАТАЛИЕВА, «Қарқара» газеті.
Салауатты өмір салтын насихаттау, өскелең ұрпақты спортқа баулу және есірткіге қарсы қоғамдық көзқарасты қалыптастыру– бүгінгі күннің өзекті мәселелерінің бірі. Осы бағытта Кеген ауданында «Спорт – есірткіге қарсы» ұранымен «Денсаулық фестивалі – 2026» атты ауқымды спорттық шара жоғары деңгейде ұйымдастырылды. Маңызды іс-шараға аудан жұртшылығы көптеп жиналып, ел болашағына бейжай қарамайтын азаматтардың басын қосты. Фестивальдің салтанатты ашылуына Кеген ауданының әкімі Нұрбақыт Молдахметұлы Теңізбаев, Алматы облысы Полиция департаментінің Есірткі қылмысына қарсы іс-қимыл басқармасы бастығының орынбасары, полиция подполковнигі Дастан Маратұлы Жексенбеков, осы басқарманың аса маңызды істер жөніндегі аға жедел уәкілі, полиция подполковнигі Алтын Есболсынқызы Темірғалиева, аудандық мәслихат төрағасы Алмасбек Нөкербанұлы Нұрман, ақын, журналист, Қазақстан Жазушылар одағының мүшесі, Райымбек ауданының Құрметті азаматы Қәдірбек Құныпияұлы, «Алатау арайы» газетінің бас редакторы Қуаныш Тұңғатар, аудандық ардагерлер кеңесінің төрағасы Шынтыс Тұрсынов және сала өкілдері қатысты.
Фестивальдің ашылуында сөз сөйлеген аудан әкімі Нұрбақыт Молдахметұлы Теңізбаев жастарды спортқа баулу – ел болашағына салынған инвестиция екенін атап өтіп, ”Спорт – тек дене шынықтыру ғана емес, ол тәртіп пен табандылықтың, дұрыс өмірлік ұстанымның негізі. Есірткіге қарсы күрес ең алдымен салауатты санадан басталады. Бүгінгі фестиваль – осы бағыттағы нақты әрі маңызды қадам, – деді аудан басшысы.
Алматы облысы Полиция департаментінің өкілдері өз сөздерінде жастар арасында есірткі қылмысының алдын алуда спорттық және тәрбиелік іс-шаралардың маңызы зор екенін атап өтті. Қоғам болып бірігіп әрекет еткенде ғана зиянды әдеттерге тосқауыл қоюға болатыны айтылды.
Фестиваль аясында спорттың бірнеше түрі мен ұлттық спорттан жарыстар ұйымдастырылып, тартысты бәсекеге ұласты. Жарыстарға қатысқан жастар мен спорт сүйер қауым өздерінің шеберлігін, ептілігі мен төзімділігін көрсете білді. Әр сайыс жоғары деңгейде өтіп, көрермендерге ерекше серпін сыйлады.
Жарыс қорытындысы бойынша үздік нәтиже көрсеткен жеңімпаздар мен жүлдегерлерге ұйымдастырушылар тарапынан бағалы сыйлықтар мен арнайы марапаттар табысталды. Бұл өз кезегінде жастардың спортқа деген қызығушылығын арттырып, алдағы уақытта да белсенділік танытуына үлкен мотивация берді.
Фестиваль барысында ақын, қоғам қайраткерлері мен ардагерлер жастарға ақ тілектерін арнап, өмірдің ең үлкен байлығы – денсаулық екенін, ал спорт сол денсаулықты сақтаудың сенімді жолы екенін ерекше атап өтті.
«Денсаулық фестивалі – 2026» тек спорттық шара ғана емес, жастарға бағыт-бағдар беретін, қоғамды ойландыратын, есірткіге қарсы ортақ жауапкершілікті сезіндіретін маңызды алаңға айналды десек болар.
Салауатты ұрпақ – ел ертеңі. Осы жолда аудан көлемінде өткен бұл фестиваль аудан өміріндегі тағылымы мол, тәрбиелік мәні зор игі бастама ретінде өз орнын бекемдеген шара болғаны айқын.
