Туған жердің дара перзентіне тағзым
Қапез Байғабылұлының туғанына 130 жыл
Тоғызбұлақта Қапез Байғабылұлының 130 жылдығы аталып, ауылдық кітапхана оқырманына есігін айқара ашты.
Қазақ руханиятының тарихында өзіндік орны бар, ел жадында жыршы-сазгер, көрнекті ақын ретінде сақталған Қапез Байғабылұлының туғанына 130 жыл толуына орай Тоғызбұлақ ауылында тағылымы терең, мазмұны бай мерекелік іс-шара өтті. Айтулы күн ауыл мәдениеті үшін қос қуанышпен ерекшеленіп, осы мереке аясында Тоғызбұлақ ауылдық кітапханасы салтанатты түрде ашылды.
Мерекелік жиынға арнайы қонақ ретінде Кеген ауданының әкімі Нұрбақыт Молдахметұлы Теңізбаев, аудандық мәслихаттың төрағасы Нұрман Алмасбек Нөкербанұлы, Алматы облыстық орталық әмбебап кітапханасының директоры Галия Сламбайқызы Тоқабаева, ғалым, педагог, жазушы, Кеген ауданының Құрметті азаматы Сағатбек Медеубекұлы, сондай-ақ Сүйінбай атындағы Алматы облыстық филармониясының директоры Нұрлан Сағынаев бастаған өнер өкілдері, зиялы қауым мен ауыл тұрғындары қатысты.
Руханиятқа бастар жаңа қадам бағыты аясында Тоғызбұлақ ауылындағы мәдениет үйінің құрамында жаңадан ашылған ауылдық кітапхананың қызыл лентасы қиылып, қонақтар кітапхананың ішкі құрылымымен, оқу залдары мен қызметтік кабинеттерімен танысты.
Салтанатты рәсімде сөз сөйлеген аудан әкімі Нұрбақыт Молдахметұлы Теңізбаев бұл бастаманың ауыл тұрғындары үшін маңызы зор екенін атап өтіп,-”Кітапхана – білім мен тәрбиенің, ұлттық сананың алтын ұясы. Қапез Байғабылұлы сынды тұлғалардың мерейтойын атап өту арқылы біз жас ұрпақты туған жерін сүюге, рухани құндылықтарды қастерлеуге тәрбиелейміз. Бүгін ашылып отырған кітапхана ауылдың рухани өмірін жандандыратын маңызды орталыққа айналатынына сенім мол”,– деді.
Алматы облыстық орталық әмбебап кітапханасының директоры Галия Сламбайқызы Тоқабаева жаңа кітапхананың облыстық кітапханалар желісіндегі орнына тоқталып, ауыл оқырмандары үшін әдеби қорды жүйелі түрде толықтыру жоспарланғанын жеткізді.
Ақын мұрасы – ұрпаққа аманат,-демекші, мерекелік кеш «Туған жердің дара перзенті– Қапез Байғабылұлы» атты оқырмандар конференциясымен жалғасты. Конференция барысында ғалым-жазушы Сағатбек Медеубекұлы ақынның шығармашылық мұрасы, оның қазақ әдебиеті мен халық мәдениетіндегі орны туралы мазмұнды баяндама жасады. Қапез Байғабылұлының ел өмірі, туған жер, адамгершілік пен ар-намыс тақырыптарын арқау еткен жырлары бүгінгі ұрпақ үшін де тәрбиелік мәнін жоймағаны айтылды. Конференцияда оқушылар мен оқырмандар ақын өлеңдерін оқып, оның шығармаларына қатысты ой-пікірлерімен бөлісті.
Өнермен өрілген тағылымды кеш концерттік бағдарламаға ұласты. Сүйінбай атындағы Алматы облыстық филармониясының өнерпаздары Қапез Байғабылұлының әндері мен халықтық шығармаларды орындап, кешке ерекше рухани рең берді. Ән мен жыр сабақтасқан кеш көрермендерді ыстық ықыласқа бөледі.
Бұл игі бастама – туған жерге деген тағзымның, руханият пен мәдениетке көрсетілген зор құрметтің айқын көрінісі. Мәдениет үйінің құрамында ашылған жаңа кітапхана алдағы уақытта Тоғызбұлақ ауылы тұрғындары үшін білім мен тәрбиенің, рухани жаңғырудың ордасына айналары сөзсіз.
Ұлт рухын ұлықтаған, ел жадындағы асыл мұраны жаңғыртқан мұндай тағылымды шаралар туған жер тарихын терең танып, ұлттық құндылықтарды қадірлеуге бастайтын мазмұнды ой салар болары анық.
Лаура ҚАРАСАРТОВА.
