Ел қауіпсіздігі – елдік жауапкершілік

Лаура Мұхаметқали, Суреттерді түсірген: Мира МУРАТАЛИЕВА, «Қарқара» газеті.

Жуырда аудан орталығында №7 өрт сөндіру бөлімі салтанатты түрде ашылды.
Қауіпсіздік – қоғам тұрақтылығының берік тірегі. Осы ұстанымды басшылыққа алған мемлекет тарапынан азаматтық қорғау саласын дамытуға бағытталған жүйелі жұмыстар өңірлерде нақты жүзеге асып келеді. Соның жарқын дәлелі ауданымызда өрт сөндіру бөлімінің пайдалануға берілуі. Аталған нысанның ашылуына орай Алматы облысының әкімі Марат Елеусізұлы Сұлтанғазиев ауданға арнайы іссапармен келіп, салтанатты рәсімге қатысты. Сондай-ақ шараға Қазақстан Республикасының Төтенше жағдайлар министрі, генерал-лейтенант Шыңғыс Сайранұлы Әрінов, облыстық Төтенше жағдайлар департаментінің басшылығы, Кеген ауданының әкімі Теңізбаев Нұрбақыт Молдахметұлы, сала ардагерлері, мекеме басшылары мен аудан тұрғындары қатысты. Салтанатты рәсім Мемлекеттік Гимнмен басталып, жеке құрам сап түзеп, жаңа нысанның ашылуы жоғары деңгейде өтті. Министр Шыңғыс Сайранұлы Әрінов өз сөзінде жаңа өрт сөндіру бөлімінің маңызын атап өтіп, бұл нысанның адам өмірін қорғаудағы рөліне тоқталды.

“Құтқарушы мамандығы – ерлік пен жауапкершілікті талап ететін қызмет. Жаңа бөлім халыққа жедел көмек көрсетуге мүмкіндік беріп, өңірдің қауіпсіздігін нығайтады”, – деді министр.
Облыс басшысы Марат Елеусізұлы Сұлтанғазиев кереге таулы Кеген өңіріне арнайы келіп, жаңа өрт сөндіру бөлімінің лентасын қиып, нысанның ресми ашылуын жүзеге асырды. Лента қию рәсімінен кейін облыс әкімі ізгі ниетін білдіріп, аудан тұрғындарына ақ тілегін арнады. “Қауіпсіздік – ең алдымен адам өмірінің кепілі. Кеген сияқты табиғи ерекшелігі бар, аумағы кең аудандарда өрт сөндіру және құтқару қызметінің уақтылы әрекет етуі аса маңызды. Бұл нысан – халықтың тыныштығына, елдің ертеңіне салынған инвестиция”, – деді облыс әкімі. Сонымен қатар Марат Елеусізұлы облыста азаматтық қорғау саласын дамытуға ерекше көңіл бөлініп отырғанын айтып, жаңа бөлімнің материалдық-техникалық базасы заман талабына сай екенін атап өтті.
Салтанатты жиында сөз алған аудан әкімі Теңізбаев Нұрбақыт Молдахметұлы жаңа өрт сөндіру бөлімінің аудан үшін маңызын ерекше атап өттіп, “бұл бөлім– аудан халқының қауіпсіздігін қамтамасыз етудегі маңызды нысан. Елді мекендеріміз бір-бірінен алшақ орналасқандықтан, төтенше жағдайларға жедел әрекет ету – басты міндет. Бүгінгі нысан сол жауапкершіліктің нақты нәтижесі”, – деді.
Шара барысында өрт сөндіру бөліміне заманауи талаптарға сай арнайы техникалар табысталды. Атап айтқанда, «ТРЭКОЛ» жол талғамайтын автокөлігі, «КамАЗ» маркалы өрт сөндіру автокөлігі мен қызметтік «Toyota Hilux» көліктерінің кілттері салтанатты түрде тапсырылды. Сондай-ақ нысанның құрылысына үлес қосқан азаматтар марапатталды.
Салтанатты рәсім соңында азаматтық қорғау саласының ардагері Ерғали Талипов ақ батасын беріп, жас құтқарушыларға сәттілік тіледі. Келген қонақтар әрмен қарай заман талабына сай бой көтерген ғимаратпен танысты. Өрт сөндіру бөлімі толықтай заманауи құрал-жабдықтармен қамтылған. Бұл нысан алдағы уақытта аудан тұрғындарының қауіпсіздігін қамтамасыз етіп, төтенше жағдайлардың алдын алуда сенімді тірек болмақ.
Ел тыныштығы – ортақ мұрат. Осы жолда аудан орталығында ашылған жаңа өрт сөндіру бөлімі аудан өміріндегі маңызды әрі берекелі бастама ретінде аудан халқының тыныштығына қызмет етері сөзсіз.