Тоеке Тұрсынбай

Конституциялық реформа жөніндегі комиссияның кезекті отырысында айтылған ой-пікірлер мен ұсыныстарды мұқият тыңдай отырып, бұл бастамалардың еліміздің қоғамдық-саяси дамуындағы жаңа кезеңнің бастауы екенін атап өткім келеді. Конституция – мемлекеттің негізгі тірегі, халықтың еркін білдіретін, ел дамуының бағытын айқындайтын басты құжат. Сондықтан оған енгізілетін әрбір өзгеріс пен толықтыру кеңінен ойластырылып, қоғамның нақты сұранысына негізделуі тиіс.

Комиссия отырысында қозғалған негізгі мәселелердің бірі – мемлекеттік басқару жүйесін жетілдіру және билік пен халық арасындағы өзара сенімді нығайту. Бұл бағытта айтылған ұсыныстар қоғам үшін аса маңызды. Мемлекеттік органдардың жауапкершілігін арттыру, шешім қабылдау үдерісінің ашықтығын қамтамасыз ету, азаматтардың қоғамдық және саяси өмірге белсенді қатысуына жағдай жасау – қазіргі заман талабынан туындаған қажеттілік.

Конституцияда адам мүддесінің алдыңғы орынға шығуы – ел дамуының өркениетті жолын таңдағанымыздың айқын көрінісі.

Сонымен қатар, билік тармақтары арасындағы тепе-теңдікті күшейтуге бағытталған ұсыныстардың маңызы зор. Парламенттің, мәслихаттардың және жергілікті өзін-өзі басқару органдарының рөлін арттыру арқылы халықтың пікірі мен ұсынысы нақты шешімдерге әсер ететін болады. Бұл – демократиялық қоғам құру жолындағы маңызды қадам.

Қуантқан тағы бір мәселе – әлеуметтік әділеттілік пен халықтың әл-ауқатын арттыруға бағытталған ұстанымдардың нақты көрініс табуы. Мемлекет өз азаматтарының өмір сапасын жақсартуға, әлеуметтік әлсіз топтарды қорғауға міндетті. Конституциялық деңгейде бұл қағидалардың бекітілуі – халыққа берілген нақты кепіл.

Тоеке Тұрсынбай