Сатаева Ғалия пікір

Конституциялық түзетулер – тек заңға енгізілетін өзгерістер ғана емес, бұл әрбір отбасының, әрбір ана мен бала өміріне әсер ететін шешім. Біз аналар үшін ең бастысы – балаларымыздың болашағы, олардың қауіпсіздігі, білім алу мүмкіндігі және әрқайсысының тең құқығы. Сол себепті, кез келген түзетулер алдымен осы мәселелерге қызмет етуі тиіс деп есептеймін.

Анамыз ретінде мен қоғамдағы әділеттілікті, әр отбасының әлеуметтік қорғалуын ерекше маңызды деп санаймын. Біз өмірде күнделікті көріп отырмыз, кейбір отбасылар қиындыққа тап болады, балалардың сапалы білім алуына, дұрыс дамуына жағдай жасалмай жатады. Конституциялық түзетулер осы олқылықтарды азайтуға, әйелдер мен аналарды, отбасыларды қолдауға бағытталса, бұл – үлкен жетістік болады.

Сонымен қатар, біз ұлттық дәстүрімізді, мәдениетімізді, тіл мен салт-дәстүрімізді сақтау мәселесіне де көңіл бөлуіміз керек. Конституциядағы кез келген өзгеріс қоғамдағы моральдық және рухани негіздерді нығайтып, ұрпаққа ата-баба аманатын жеткізуге қызмет етуі тиіс. Біз ана ретінде болашақ ұрпаққа тек білім мен құқықтық қорғау емес, сонымен қатар мәдениет пен ұлттық құндылықтарға құрмет, қоғамдық татулықты да қалдырғымыз келеді.

Кеген ауылдық аналар кеңесінің төрайымы Сатаева Ғалия