Жұмыссыз азаматтарға медициналық көмек көрсетуге 1,2 млрд теңге бөлінеді
Жұмыссыз азаматтарға медициналық көмек көрсетуге 1,2 млрд теңге бөлінеді
Әлеуметтік осал топ өкілдері үшін ақжолтай хабар. Биылдан бастап МӘМС жарналары жергілікті бюджет есебінен төленетін болады. Өткен жылы Үкіметтің кеңейтілген отырысында «Әлеуметтік осал санаттарға жататын азаматтар үшін медициналық сақтандыруға аударымдар жергілікті бюджет есебінен төленуі тиіс», деген еді Президент. Мемлекет басшысының пәрменінен кейін МӘМС аясында бірқатар өзгерістер енгізілді.
Заңдағы жаңашылдықтың арқасында 2026 жылы елімізде 1 млн адам МӘМС жүйесімен қосымша қамтылмақ.
Жаңа жылдан бастап, МӘМС жүйесіне 11 нозологияны қамтитын әлеуметтік мәні бар аурулардың (ӘМА) жаңартылған тізбесі енгізілген. Соған қарамастан МӘМС жүйесідегі медициналық көмектің қолжетімділігі мен көлемі өзгеріссіз қалады.
18 жасқа толғаннан кейін де мемлекет мүгедектігі бар адамдар үшін сақтандыру жарналарын төлеуді жалғастырады. Сондай-ақ мемлекет жұмыссыз және әлеуметтік осал азаматтарды — МӘМС жүйесіндегі D және E санаттарын сақтандырумен қамтамасыз етеді.
«Диспансерлік есепте тұрған осы санаттағы азаматтарға медициналық көмек көрсету үшін облыста 2,6 млрд теңге бөлінген, қосымша түрде жұмыссыз азаматтар үшін 1,2 млрд теңге бөлу мәселесі қарастырылуда»,-дейді Алматы облысы денсаулық сақтау басқармасының басшысы Ержан Сүлейменов.
Айта кетейік, диагностика, консультациялар, емдеу және оңалту қысқартылмайды және тоқтатылмайды — барлық қызметтер МӘМС жүйесі аясында толық көлемде көрсетіле береді.
Халықтың басым бөлігін аталмыш жүйеге қамтуды оңтайландыру мақсатында жарналар мен аударымдардың негізгі шегі өзгертілді. Нақтыласақ, жұмыс берушілер жарналарды 40 ЕТЖ-дан аспайтын сомадан, ал қызметкерлер – 20 ЕТЖ-ға дейінгі сомадан аударатын болады.
«Бүгінде Алматы облысындағы медициналық мекемелерге 1 645 171 адам тіркелген. Оның ішінде МӘМС жүйесінде «Сақтандырылған» мәртебесі бар азаматтар саны 1 343 718 адамға жетіп жығылады»,-деді Әлеуметтік медициналық сақтандыру қорының Алматы облыстық филиалы директоры Нұрлан Қыдырбаев.
Қарасай ауданы бойынша МӘМС жүйесінің жауапты координаторы Гүлнара Жайсанбаеваның сөзіне сүйенсек, бір ғана Қарасай ауданында 309 557 адам сақтандыру мәртебесіне ие.
«2025 жылы жергілікті құзырлы органдармен бірлесе жұмыс жасау барысында Қарасай ауданында 10 089 азамат МӘМС жүйесіне тіркелді»,-дейді спикер.
Еске саламыз, 1 қаңтардан бастап енгізілген өзгерістерді халыққа түсіндіру мақсатында медициналық ұйымдардың call-орталықтарының жұмысы күшейтілді.
