Ана отбасылық құндылықты қалыптастырушы

Мәдениет – ұлттың мәйегі, ал мәдениетті ұрпақтың бастауы – ана. Осы ұлағатты ұстанымды арқау еткен “Мәдениетті ана-мәдениетті ұлт” жобасы аясында ауданда тағылымы мол, тәрбиелік мәні зор “Салауатты сана” бағыты бойынша “Ана-отбасылық құндылықты қалыптастырушы” атты аналар байқауы ұйымдастырылды.

Аудандық аналар кеңесінің бастамасымен, аудандық “Ішкі саясат” бөлімінің қолдауымен және “Ақжүрек” мүгедектер қоғамдық бірлестігінің атсалысуымен өткізілген шара– тек өнер мен тапқырлықтың емес, ананың қоғамдағы, отбасындағы рөлін насихаттаудың, ұлттық құндылықты ұлықтаудың жарқын үлгісі болды.
Киелі шаңырақтың шырағын жағып отырған аналарымыз бұл байқауда бірінен бірі өтетін өнерімен, білімімен, инабатымен, парасатымен көрінді.

Сайыс бірнеше кезеңнен тұрды:
“Мен және менің отбасым” таныстыру;
“Бардың бағасын біл” – отбасындағы дәстүр мен тәрбиеге мән беру;
“Шығармашыл ана” – өнер мен шеберлік көрінісі;
“Ана – дана”– білім мен ұтқырлық сыналатын кезең.

Бұл сайыс тек жарысу емес, ананың ізгілігі мен ақылын, салт-санамызды жаңғыртатын үлгі-өнеге кеші болды. Байқаудың қорытындысы бойынша:

Бас жүлде – Кеген ауылдық округінен Сәрсенбаева Айнагүл Сабырқызына бұйырды.
І орын – Шырғанақ ауылынан Жанбыршиева Дария Жақыпжанқызы,
ІІ орын – Жалағаш ауылынан Нұрахмет Айтолқын Еркінқызы,
ІІІ орын – Бөлексаз ауылынан Мұқашева Толқын Еркінқызы иеленді.

Салмақты сөз саптауы, өнерлі қырлары мен анаға тән болмысы арқылы көрерменнің ыстық ықыласына бөленген аналарымыз – ұлттық тәрбиенің тірегі екенін тағы бір мәрте дәлелдеді. Осындай игі шаралар қоғамның рухани тамырына нәр берері анық. Ана – тек отбасының емес, ел болашағының сәулесін жаққан шырақ екенін ұмытпағанымыз абзал.

Лаура Мұхаметқали.