Тұрмыстың зорлық – зомбылықтың алдын алу

Еліміздің дамуындағы басты құндылықтардың бірі – қоғамдық тәртіп пен қауіпсіздік. Мемлекетіміздің тұрақтылығы мен азаматтардың тыныштығы әрбір адамның заңға бағынуы мен ортақ жауапкершілік танытуына тікелей байланысты. Осы бағытта ауданда “Таза Қазақстан” акциясы аясында құқықтық тәртіп пен діни тұрақтылықты сақтау, сондай-ақ тұрмыстық зорлық- зомбылықтың алдын алу мақсатында аудандық мәдениет үйінде кеңейтілген жиын өтті.

Жиынға аудан әкімдігіне қарасты бөлім басшылары, құқық қорғау органдарының өкілдері, дін және спорт саласының мамандары, қоғам белсенділері мен жастар қатысты. Іс-шарада аудандық “Балалар мен жасөспірімдер спорт мектебінің” директоры Талип Бауыржан, ауданның бас имамы Сатыбалды Әзім, аудан прокуроры, кіші Әділет кеңесшісі Данилов Алмат, “Ішкі саясат” бөлімінің басшысы Қалқаев Еркінбек, “Мәдениет, тілдерді дамыту, дене шынықтыру және спорт” бөлімінің басшысы Тәтібаев Талғат және ювеналды полиция инспекторы Анекеева Маржан өз салалары бойынша баяндама жасап, өзекті мәселелерге тоқталды.
Сарапшылар әсіресе жастар арасындағы құқықбұзушылықтың алдын алу, діни сауаттылықты арттыру, отбасы ішіндегі зорлық-зомбылықты жою бағытында кешенді жұмыстар жүргізу қажеттігін айтты. Сонымен қатар, қоғамда орын алатын кез келген құқық бұзушылыққа немқұрайлы қарамай, бірлесе әрекет ету қажеттігі де баса айтылды.
Жиын – тек ақпарат алмасу алаңы емес, азаматтық жауапкершілікке шақырған маңызды үндеу алаңы болды. Осындай кездесулер арқылы құқықтық мәдениет пен заңға құрметті қалыптастыру, діни экстремизмге тосқауыл қою және әлеуметтік үйлесімділікті сақтау – баршаға ортақ міндет екені айқындалды.
Кеңейтілген жиыннан түйгеніміз – ел болашағының баянды болуы әрбір азаматтың заңды құрметтеп, әділет пен парасатты биік ұстауынан бастау алмақ.

Лаура Қарасартова.