Тағлымды кездесу өтті

Тарих беттерінде алтын әріппен жазылған 1986 жылғы Желтоқсан көтерілісі – ел еркіндігі мен ұлт рухының биік көрінісі. Сол бір қазақ жастарының қайсарлығын, Тәуелсіздік жолындағы жанқиярлық күресін ұмытпай, келешек ұрпаққа үлгі ету – қасиетті борышымыз.
Осыған орай, 16 желтоқсан – Тәуелсіздік күні қарсаңында Кеген аудандық әкімдігінің кіші мәжіліс залында Желтоқсан қаһармандарымен тағылымды кездесу өтті.
Кездесуге аудан әкімінің орынбасары Кеңес Күнесбайұлы, тиісті мекеме басшылары, ардагерлер мен 1986 жылғы Желтоқсан оқиғасына қатысушылар қатысты. Ізгі ниет пен құрмет аясында ұйымдастырылған бұл жиын ел тарихындағы елеулі оқиғаны еске алып қана қоймай, бүгінгі ұрпақ пен кешегі ерлер арасында рухани байланысты нығайтты.
Кездесу барысында Желтоқсан оқиғасына қатысқан азаматтар өз естеліктерімен бөлісіп, сол күндердегі тарихи сәттерді тебірене еске алды. Олардың әр сөзі – елдік пен ерліктің айғағындай. Сонымен қатар, ардагерлер тарапынан әлеуметтік мәселелер, жастарға патриоттық тәрбие беру, тарихи әділеттілік турасында нақты ұсыныстар айтылды.
Аудан әкімінің орынбасары Кеңес Күнесбайұлы өз сөзінде Желтоқсан құрбандарына тағзым ете отырып, ардагерлердің Тәуелсіздік жолындағы ерліктері ешқашан ұмытылмайтынын, олардың ұлт болашағына қосқан үлесі қашанда құрметке лайық екенін атап өтті. Кездесу соңында тиісті мекеме басшыларына нақты тапсырмалар жүктеліп, көтерілген мәселелер назарға алынды.
Мұндай тағылымды кездесулер өскелең ұрпаққа өткеннің өнегесін жеткізіп, елдік пен ерліктің қадірін ұғындыруға бағытталған игі шара екені сөзсіз. Желтоқсан қаһармандары – бүгінгі Тәуелсіз Қазақстанның тарихи тұғыры, рухани тірегі.

Лаура Қарасартова.