Бір мезетте екі спорт зал ашылды

Спорт-адамды шынықтыратын ғана емес, мінезін тәрбиелейтін ұлы мектеп. Кеген ауданында спортты қолжетімді ету, ауыл-қала демей жастарды спортқа баулуды, чемпиондар мен тұлғаларды тәрбиелеу мақсатында «Батыр боламын» қорының қолдауымен Ақтасты, Шырғанақ ауылдарында бір мезетте екі спорт зал ашылды.

 «Батыр боламын» қоры- еліміздің түкпір-түкпірінде спортты қолдап, жас буынның денсаулығы мен дамуына жағдай жасап келе жатқан ұйым. Қордың негізгі мақсаты әр балаға спортпен айналысуға мүмкіндік беру, олардың кәсіби өрлеуіне жол ашу.

Қор бүгінге дейін елімізде 70-тен астам спорт залдарын ашып,  спорттың әр түрлерімен тегін айналысуға мүмкіндік берді. Сондай-ақ, спорттық жабдықтармен қамтамасыз етіп, ауыл балаларына дене шынықтырумен айналысуына жағдай жасауда.

Игілікті істің тұсауын кесуге аудан әкімі Нұрбақыт Теңізбаев, «Батыр боламын» Қоғамдық қорының негізін қалаушысы, «Адамның адал жолы» жауапкершілігі шектеулі серіктестігінің директоры Арман Балкенұлы, Ересектер арасындағы еркін күрестен Қазақстан чемпионы, Қазақстан тарихындағы алғашқы әлем чемпионатының алтын иегері, Қазақстан Республикасының еңбек сіңірген спорт шебері Ризабек Айтмұхан, Қазақстандық еркін күрескер, әлем және  Азияның бірнеше дүркін чемпионы  Қайпанон Нұрқожа Аралбекұлы, «ННН» лақап атымен танымал, белгілі блогер Нұрдаулет Берікұлы келді. Солардың қатарында Ақтасты ауылының тумасы, тұңғыш дзюдо және самбо күресінен Әлем кубогының иегері, дзюдодан Азия чемпионы, самбодан әлем чемпионатының қола жүлдегері,  Қазақстан Республикасының бірнеше дүркін чемпионы, спорт шебері, Кеген ауданының Құрметті азаматы Айсара Керімбекова, аудандық маслихат төрағасы Алмасбек Нұғыман, мекеме басшылары және ауыл тұрғындары қатысты.

 Алғашқы құттықтау сөз алған аудан әкімі Нұрбақыт Теңізбаев:

– Бұл- ауылдағы спорттық инфрақұрылымды дамытуға, жастардың бос уақытын тиімді өткізуге, ден тәрбиесіне баулуға жасалған үлкен қолдау. Бүгінгі жас-ертеңгі елдің тірегі. Біздің міндетіміз- өскелең ұрпақтың жан-жақты дамуына барлық жағдай жасау. «Батыр боламын» қоғамдық қорының бастамасы, тек спорт құралдарын тарату емес, бұл ауылдағы балалардың болашағына ашылған жаңа мүмкіндіктер. Ал, ауыл баласының бойындағы талант пен күш-жігерді аша білу-бәріміздің ортақ парызымыз. Қордың қолдауы-шынайы отансүйгіштік пен азаматтық жауапкершіліктің жарқын көрінісі екенін атап өткім келеді. Берілген спорттық құрал-жабдықтар ауыл  балаларының талайын үлкен спорт жолына жетелейді деп сенеміз, – дей келе алдағы уақытта да бұл бағыттағы жұмыстар жалғасын таба беретіндігін тілге тиек етті. Сондай-ақ, аудан басшысы игі бастаманың басында жүрген азаматтарды Алғыс хаттармен марапаттап, иықтарына шапан жапты.

Тұңғыш дзюдо және самбо күресінен Әлем кубогының иегері, дзюдодан Азия чемпионы, самбодан әлем чемпионатының қола жүлдегері,  Қазақстан Республикасының бірнеше дүркін чемпионы Айсара Керімбекова, «Батыр Боламын» Қоғамдық қорының негізін қалаушысы Арман Балкенұлы, Ақтасты ауылының тұрғыны Қанат Әлиасқаровтар құттықтау сөз алып, жылы лебіздерін білдірді.

Бұл спорт залдың күрделі жөндеу жұмыстарына білек сыбана кіріскен ауыл жастарының еңбектерін айта кеткен жөн.

-Ауыл жастары жұдырықтай жұмылып,  жастардың бос уақытын тиімді пайдалану, Айсара апамыздың жолын жалғап, ізін қуатын жастарды тәрбиелесек, ауылымызда жаттығу залы болса деген ниетте жұмыла іске кірістік. Спорт залды жасауды көктем мезгілінде қолға алдық. Жастар қаржы жинап, қыруар жұмыстар атқарды. Сондай-ақ, спорт залға керекті заттар алып берген аудан әкімі Нұрбақыт Молдахметұлына, демеушілік танытқан ағаларымызға ауыл жастарының атынан зор алғысымды білдіргім келеді,-дейді Ердос Төлегенұлы.

Ауыл тұрғыны Сағат Байсабаев ақсақал батасын берген соң, жаңа спорт залының лентасын қию рәсімі жасалып, ақ жаулықты аналар шашу ашты.

Қонақтар мен спортшылар спорт залына келген жас буын өкілдеріне шеберлік сағатын өткізіп, көптің ықыласына бөленді.

-Спорт залының ашылуы Ақтасты, Шырғанақ ауылдары үшін үлкен оқиға болды. Себебі, осыған дейін ауыл тұрғындарының осындай маңызды жобаны жүзеге асыра алатынымызға күмәнданғаны рас. Залдарды жабдықтап, тиянақты дайындадық. Шынында да, ауылдарда спортпен үнемі шұғылданғысы келетін дарынды бала өте көп. Бірақ, барлық жерде бірдей жағдай жасалмаған,- деді «Батыр боламын!» қоғамдық қорының негізін қалаушысы Арман Балкенұлы.

Сондай-ақ, бұл күні бес елді-мекеннен тұратын Шырғанақ ауылында спорт зал ел игілігіне берілді. Ауыл тұрғындарына үлкен қуаныш сыйлаған спорт залдың ашылу салтанатына аудан әкімі Нұрбақыт Теңізбаев пен аудандық маслихат төрағасы Алмасбек Нұғыман, «Германиядағы Кеңес әскерінің тобы мен Варшава Келісім шарты әскерінің тобының» ардагерлері, құрметті қонақтар қатысып, құттықтау сөздерін айтты.

Салтанатты шара аясында Шырғанақ ауылының ақсақалдар алқасының төрағасы Ермахан Құрманғалиев бата берсе, спорт залының ашылуына ықпал жасаған Оразбай Бекбатыров жұртшылыққа жүрекжарды алғыстарын жеткізді. Жаңа спорт залының лентасы қиылып, шашу шашылды.

Айта кетейік, спорт нысанда бокс, күрес, шаңғы түрлерінен ауыл тұрғындары мен жасөспірімдер бұқаралық спорт түрлерімен тұрақты шұғылданса, жуыну бөлмесі, киім ауыстыру бөлмесі, жаттықтырушы бөлмелері талапқа сай толық жасалынған.

     Алдағы уақытта жаңартылған спорт залдары жастардың спортқа қызығушылығын арттырып, талай чемпиондарды тәрбиелеп шығаруға негіз болары анық. Ылайым солай болсын!

Дәурен ЕРМЕКБАЙ.