ИНВЕСТИЦИЯ – ӨҢІР ДАМУЫНЫҢ БАСТЫ ТІРЕГІ
Лаура Мұхаметқали, Суреттерді түсірген: Мира МУРАТАЛИЕВА.
Мемлекет басшысы Қасым-Жомарт Тоқаев өзінің “Әділетті мемлекет. Біртұтас ұлт. Берекелі қоғам” атты Жолдауында еліміздің экономикасы сыртқы саудаға және инвестицияға әрдайым ашық екенін, бұл бағыттағы жұмысты жүйелі жүргізу Үкіметтің басты міндеттерінің бірі екенін ерекше атап өтті. Президенттің осы тапсырмасына орай Кеген ауданында инвестициялық жобалардың жүзеге асу барысы, өзекті мәселелері мен алдағы жоспарлары талқыланған кеңейтілген жиын өтті.
Аудан әкімдігінің мәжіліс залында өткен басқосуға аудан әкімі Нұрбақыт Теңізбаев төрағалық етті. Жиынға аудан прокуроры А. Данилов, ҚР ҰҚК Алматы облысы бойынша департаментінің Кеген аудандық бөлімінің бастығы, ұлттық қауіпсіздік подполковнигі Р.Ажібаев, аудан әкімінің орынбасарлары, бірқатар басқарма және бөлім басшылары, сондай-ақ аудан аумағында жұмыс істеп жатқан ірі және орта деңгейдегі инвесторлар қатысты.
Аудан әкімі Нұрбақыт Молдахметұлы өз сөзінде өңір экономикасының негізгі қозғаушы күші – инвестиция екеніне тоқталып, кәсіпкерлік пен туризм саласына құйылып жатқан қаржы көлемі жылдан-жылға артып келе жатқанын атап өтті. Бұл – ауданның инфрақұрылымын жақсартуға, жұмыс орындарын көбейтуге, экономиканы әртараптандыруға бағытталған нақты істердің нәтижесі.
Негізгі капиталға инвестиция тарту 2025 жылдың 10 айында 9,8 млрд теңге болып нақты көлем индексі 2 есеге орындалды.
Аудан аумағында 2024-2028 жалдарға құны 164,3 млрд теңгені құрайтын 43 инвестициялық жобалар іске асыру жоспарлануда. Олард 612 жаңа жұмыс орны құрылмақ.
Туризм саласы бойынша – 8 жоба;
Өнеркәсіп өндіріс бойынша 6 жоба;
Ауылшаруашылығы саоасы бойынша – 4 жоба;
Электр энергиясын өндіру саласы бойынша-25 жоба көзделген.
Жиын барысында сөз алған инвесторлар өз жобаларын таныстырып, кездесіп отырған кейбір мәселелерді ортаға салды. Олардың қатарында инфрақұрылымға қосылу, жер қатынастары, рұқсат құжаттарын рәсімдеу, жергілікті қолдаудың нақты тетіктері секілді мәселелер қозғалды. Инвесторлар билік өкілдерінен ашық диалог пен жан-жақты қолдау күтетіндерін жеткізді.
Мемлекеттік органдар тарапынан да нақты жауаптар беріліп, көтерілген мәселелердің заң аясында шешу жолдары қарастырылды. Жиын нәтижесінде аудан әкімі тиісті сала басшыларына нақты тапсырмалар беріп, әрбір жобаның орындалуын жіті бақылауда ұстауды тапсырды.
Кеген ауданы үшін инвестиция – тек қана қаржылық пайда емес, сонымен бірге жаңа технологиялар мен тәжірибелер, заманауи жұмыс тәсілдері, тұрақты әлеуметтік серіктестік пен дамудың жаңа баспалдағы. Сондықтан, аудан басшылығы инвестициялық ахуалды жақсартуға, инвесторларға қолайлы жағдай жасауға баса назар аударып келеді.
Осындай ашық форматта өткен кездесу – билік пен кәсіпкер арасында сенімді қарым-қатынас орнатудың бір қадамы. Алдағы уақытта осындай жиындардың тұрақты түрде өтуі – өңір экономикасының жандануына үлкен серпін беретіні сөзсіз.
