«ХХІ ғасыр оқушысы» – білімді жастардың интеллектуалдық додадағы жарқын жеңісі

Кеген ауданының жас буынына серпін беретін, білімге құштарлығын арттыратын ауқымды шара өтті. Кеген ауданы әкімдігі мен ауданның «Ішкі саясат бөлімі» мемлекеттік мекемесінің қолдауымен, “Қамқор – Кеген” Алматы облысының есту қабілеті нашар мүгедектердің қоғамдық бірлестігі ұйымдастырған ерекше форматтағы «ХХІ ғасыр оқушысы» атты интеллектуалдық жарыс Кеген ауылындағы Ө.Жаңабаев атындағы орта мектепте жоғары деңгейде өткізілді.
Жарыстың басты мақсаты – қазіргі заман оқушысының ой-өрісін кеңейту, интеллектуалдық қабілетін шыңдау, өз мүмкіндігін танытып, жаңаша ойлауға жетелеу болатын.
Байқауды мектептің қосымша білім беру мұғалімі Ж.Сайлаубекқызы жан-жақты дайындықпен ұйымдастырып, шебер жүргізуі оқушылардың қызығушылығын арттырып, жарысқа ерекше серпін берді. Әр кезең оқушылардың білімін ғана емес, логикалық ойлауын, шапшаңдығын, заманауи тенденцияларды түсінуін анықтап берді.
Жоғарғы сыныптың үздік деген оқушылары өзара бақ сынасып, білім додасында өз әлеуетін танытты. Қатысушылар заманауи технологиялар, ұлттық құндылықтар, әлемдік ғылым жаңалықтары және қоғамдық өмір тақырыптарында сұрақтарға жауап беріп, ХХІ ғасырдың талаптарына сай ойлай алатынын дәлелдеді.
Шара барысында оқушылар бір-бірімен пікір алмасып, жаңа достық байланыстар орнатты. Ал ұйымдастырушылар мұндай зияткерлік іс-шаралар жастардың тұлғалық дамуына ықпал ететінін атап өтіп, алдағы уақытта да жалғасын табатынын жеткізді.
«ХХІ ғасыр- білім мен бәсекенің ғасыры. Бүгінгі жарыс – болашақтың интеллектуалдық көшбасшыларын тәрбиелеуге қосылған үлес» деген ой білдірді қатысушылар мен ұстаздар қауымы.

Ф.Акимбекова,
“Кеген-Қамқор” Алматы облысының есту қабілеті нашар мүгедектердің қоғамдық бірлестігінің төрайымы.