Ауданға іссапармен келді
ҚР Президентінің кеңесшісі Мәлік Отарбаев ауданға ат басын бұрып аудан активі, ауылдық округ әкімдері, БАҚ өкілдері және тұрғындармен кездесіп, ел Президенті Қасым Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдаудың мазмұнын аудан тұрғындарына түсіндіріп, жергілікті деңгейде іске асыру бағыттарын анықтауды көздеді.
Кездесуді Алматы облысы әкімінің орынбасары Ғ.А. Майлыбаев жүргізіп отырды.
Жиынның басты мақсаты – Президент Жолдауындағы цифрлық трансформация, жасанды интеллект енгізу, әлеуметтік және экономикалық өзекті мәселелерді жергілікті деңгейде шешу жолдарын белгілеу. Инфрақұрылымды жаңғырту. Цифрлық өзгерістер, жасанды интеллект, әлеуметтік дамытулар- бәрі де мемлекеттің ұлттық мүддесін, халықтың әл‑ ауқатын арттыруды қамтамасыз етуге бағытталған.
Аудан әкімі Нұрбақыт Теңізбаев 10 айдың көрсеткіші бойынша баяндама жасап, халықтың әл‑ ауқатын арттыру, цифрлық жүйелерді енгізу, ауыл инфрақұрылымын дамыту, қызмет көрсету сапасын көтеру бағыттары алға қойылғанын атап өтті.
Аудандық мәслихат депутаты Ғалия Дарубаева өз сөзінде жолдауды орындау контекстінде ауылдағы өзекті мәселе тұрғындар атынан газ тарту жөнінде ұсыныс жасады. Бұл – цифрлық трансформациямен қатар, тұрмысты жақсартуға нақты бағытталған қадам екені баса айтты.
Жылысай ауылдық округі ақсақалдар алқасының төрағасы Болат Таубалдиев сөз сөйлеп, Президент Жолдауын қолдай отырып, кейінгі жастарды ел үшін еңбек етуге шақырды. «Қоғамды цифрландыру – бұл жай ғана технология емес, ұлттық даму жолы» деді.
Қазақстан Республикасы Президентінің кеңесшісі Мәлік Нұржанұлы Отарбаевтың Кеген ауданына жасаған іссапары барысында тұрғындар өз көкейлерінде жүрген сұрақтарын қойып, тиісті сала мамандарынан нақты әрі мазмұнды жауаптар алды. Бұл– Ел Президентінің «Халық үніне құлақ асатын мемлекет» тұжырымдамасының айқын көрінісі.
Кездесу соңында аудан әкімі Нұрбақыт Теңізбаев Президент Жолдауының ауданда жүзеге асырылып жатқан бастамалары мен жетістіктеріне тоқталып, елдік мүддені көздейтін жұмыстардың жалғасын табатынын жеткізді.
– Ауданымызға арнайы ат басын бұрып, маңызды жолдаудың мән-маңызын халыққа жеткізіп, пікір алмасып, бағыт-бағдар бергеніңіз үшін алғыс білдіреміз. Алдағы уақытта Мемлекет басшысының бастамасымен, облыс әкімінің қолдауымен және елдің ауызбіршілігі арқасында Кеген ауданы дамудың жаңа белестеріне көтеріле бермек,– деп, кездесу соңында делегация мүшелеріне аудан тұрғындары атынан ризашылық білдірді.
