Алматы облысында мұздағы қауіпсіздік шаралары күшейтілді
Алматы облысында мұздағы қауіпсіздік шаралары күшейтілді
Қармағын салып, балық аулап, керемет көңіл күймен демалыс өткізгісі келетін әуесқой балықшылар көп-ақ. Алайда қызық көремін деп, бір ғана шалыс қадамның соңы орны толмас қайғыға әкелуі мүмкін. Төтенше жағдайлар қызметінің сақтық шараларын сақтауды үнемі ескертіп, дабыл қағатыны да сондықтан.
Қыркүйек айынан бастап күзгі–қысқы балық аулау маусымы басталды. Осыған байланысты жазатайым оқиғалардың алдын алу мақсатында балық аулау кезіндегі мінез-құлық ережелерін түсіндіру жұмыстарына басымдық беріліп отыр.
Су айдындарындағы қауіпсіздікті күшейту үшін жергілікті атқарушы органдармен бірлесе отырып, қауіпсіздік белгілерінің санын арттыру бойынша кешенді шаралар қабылданған.
«Өзендер мен көл жағалауындағы арнайы ескерту тақтайшаларының санын ұлғайту үшін жауапты мекемелерге хат жолдадық. Сондай-ақ көпшіліктің жұқа мұзға шығуына шектеулер қойылды. Полиция басқармасымен бірлесіп, қысқы кезеңде су айдынында балаларды қараусыз қалдырған ата-аналарды әкімшілік жауапкершілікке тарту мәселесі пысықталуда», – деді Алматы облысы ТЖД ТЖЖБ бастығы, азаматтық қорғау полковнигі Самат Кенжехан.
Жауаптылардың айтуынша, жыл басынан бері балық аулау кезеңінде қайғылы оқиға тіркелмеген. Тек шомылу маусымы кезінде 20 адам суға кеткен, оның төртеуі – бала.
Қауіп аяқ астында. Сондықтан ескертуді елеусіз қалдыруға болмайды. Мәселен, Төтенше жағдайлар департаменті мұздың қалыңдығы кемінде 10–15 см болуы керектігін ескертеді. Мұзға шыққан жағдайда өзіңмен бірге кемінде 15 метрлік арқан, ысқырық және өзге де қажетті құралдарды алып жүру қажет. Сақтансаң – сақтайды!
