Кеген кубогы

2025 жылғы 23 қазан күні Кеген ауылындағы балалар мен жасөспірімдер спорт мектебінде тоғызқұмалақтан оқушылар арасында «Кеген кубогы» турнирі өтті.
Іс-шара Кеген ауданы әкімдігінің және аудандық «Ішкі саясат» бөлімінің қолдауымен, сондай-ақ «Қамқор- Кеген» Алматы облысының есту қабілеті нашар мүгедектердің қоғамдық бірлестігінің ұйымдастыруымен өткізілді.
Турнирдің негізгі мақсаты– ұлттық спорт түрі тоғызқұмалақты дамыту, жастар арасында зияткерлік ойынды кеңінен насихаттау және олардың қабілеттерін танытуға мүмкіндік жасау болып табылады.
Жарысқа аудандағы С. Серкебаев атындағы мектеп-гимназиясы мен К.Нұрпейісов атындағы мектеп-лицей, Ө.Жаңабаев атындағы орта мектеп, Бөлексаз, Қарқара орта мектептерінен келген 30-ға жуық оқушы қатысып, өзара бақ сынады.
Ойын барысында жас спортшылар өз шеберліктерін көрсетіп, жоғары деңгейдегі дайындықтарын байқатты.
Турнир қорытындысы бойынша жеңімпаздар мен жүлдегерлер анықталып, оларға арнайы дипломдар, медальдар және естелік сыйлықтар табыс етілді.
Іс-шара соңында ұйымдастырушылар мен қонақтар қатысушыларды жетістіктерімен құттықтап, турнирдің ұлттық құндылықтарды дәріптеу мен жастардың зияткерлік әлеуетін арттырудағы маңыздылығын атап өтті.
Осындай игі бастамалар алдағы уақытта да өз жалғасын тауып, Кеген ауданында ұлттық спорт түрлерін дамыту бағытында жүйелі жұмыстар жүргізілетін болады.
Ф. Акимбекова,
“Қамқор-Кеген” Алматы облысының есту қабілеттері нашар мүгедектердің қоғамдық бірлестігінің төрайымы.