Кеген ауданының прокуратурасына басшы тағайындалды

Жуырда Кеген аудандық әкімдігінің үлкен залында жиын өтті. Жиынға аудандық мәслихаттың төрағасы, “AMANAT” партиясының аудандық филиалының өкілдері, мәслихат депутаттары, құқық қорғау органдары, мекеме басшылары, округ әкімдері, БАҚ қызметкерлері, сондай-ақ аудан ардагерлері мен прокуратура қызметкерлері қатысты. Жиынның басты мақсаты – Кеген ауданының жаңа прокурорының таныстырылымы.
Қазақстан Республикасы Бас Прокурорының 2025 жылғы 22 қазанындағы бұйрығына сәйкес, кіші әділет кеңесшісі Данилов Алмат Амитжанұлы Кеген ауданының прокуроры қызметіне ресми түрде тағайындалды.
Осыған орай өткен салтанатты басқосуда Алматы облысы прокурорының бірінші орынбасары Мамаев Қанат арнайы қатысып, жаңа прокурор Алмат Даниловтың қызметтік жолы мен тәжірибесі туралы баяндап, оның заң саласындағы біліктілігі мен жауапкершілігіне тоқталды. Сонымен қатар, аудан басшылығы мен жиналған қауым тарапынан жаңа прокурорға сенім білдіріліп, ел игілігі жолында адал қызмет ететініне үміт артылды.
Жиын барысында аудандық ақсақалдар алқасының төрағасы Сабыр Досымбеков бата беріп, Алмат Амитжанұлына ел тыныштығы мен заң үстемдігі жолындағы жауапты қызметінде табыс тіледі.
Аудан жұртшылығы Кегеннің жаңа прокурорын жылы қабылдап, құқықтық тәртіп пен әділдікті қамтамасыз ету бағытында бірлесе жұмыс атқаруға дайын екенін білдірді.
Заңды құрметтеу – елдің тұрақтылығы мен өркендеуінің негізі.
Осы бағытта жаңа прокурорға артылар сенім де, міндет те орасан болмақ.
Л.Қарасартова.