Ұлт мәртебесін айқындайтын ұлық мереке
Лаура Мұхаметқали, Суреттерді түсірген: Мира МУРАТАЛИЕВА, «Қарқара» газеті.
25 қазан – Республика күніне орай Кеген аудандық мәдениет үйінде салтанатты жиын өтті. Бұл- Қазақстан Республикасы үшін тарихи маңызы зор, елдің жаңа мемлекеттік мәртебесінің, халықтың егемендікке деген ұмтылысының айқын көрінісі болып табылатын маңызды мереке.
Салтанатты шарада алғаш сөз алған аудан әкімі Нұрбақыт Теңізбаев жиналған қауымды мерекемен құттықтап, бұл күннің маңыздылығына ерекше тоқталды.
«Іргесі бекем, заманы бейбіт, еңсесі биік Тәуелсіз елімізде Республика күні мерекесінің кең көлемде, айшықты аталып өтуі – ұлттық болмысымыздың, ел бірлігінің, бейбіт дамуымыздың айғағы. Бұл – болашағымызды баянды ету жолындағы сенімді қадамдардың жалғасы», – деді аудан басшысы.
Мерекелік жиын барысында ел дамуына елеулі үлес қосып жүрген азаматтар марапатталып, лайықты құрметке бөленді. Атап айтқанда, Алматы облысы әкімінің Құрмет грамотасымен Нақысбеков Бекмұрат пен Нұргүл Кенжебекқызы марапатталды. Сонымен қатар, «Ауданға сіңірген еңбегі үшін» төсбелгісі Үркінбаева Оралхан, Сағындықов Шәміл, Құсайынов Бақытжан, Сұраншиев Сәбит, Сәрсенбай Болат және Манкеева Қарлығаш сынды ел жанашырларына табысталды.
Аудан әкімінің Құрмет грамотасы мен Алғыс хаттарына да бірнеше азаматтар лайық деп танылып, еңбектері еленді. Жиын барысында аудандық мәслихат төрағасы Алмасбек Нұғман мен “AMANAT” партиясы өкілдері де құттықтау сөз сөйлеп, халықты мерекемен құттықтап, мәдениет, білім, денсаулық, әлеуметтік сала қызметкерлеріне Құрмет грамотасы мен Алғыс хаттар тапсырды. Сонымен қоса “Алматы облыстық жергілікті агроөнеркәсіп кешені және мемлекеттік мекемелер қызметкерлерінің Кәсіподақтар одағы Кеген аудандық филлиалының төрағасы Төлепбердиев Қуанышбек тілек білдіріп, бір топ азматтардың “Кәсіподаққа сіңірген еңбегі үшін” төсбелгісін кеудесіне тақты.
Республика күні – бұл халық пен мемлекеттің арадағы сенімін нығайтатын, патриоттық рухты оятатын тарихи күн. Бұл мерекенің ел жадында жатталып, келешек ұрпақтың жүрегінен орын алуы – тәуелсіздігіміздің баянды болуына қосылған үлес екені сөзсіз.
Салтанатты жиын аудан өнерпаздарының концерттік бағдарламасына ұласып, мерекелік көңіл- күйді одан әрі асқақтатты. Әсем ән мен күмбірлеген күй, мың бұралған би арқылы Кеген жұртшылығы Республика күнін жоғары деңгейде атап өтті.
