Қыз өссе – елдің көркі

Кеген ауданында қыз баланың тәрбиесі мен өнерін дәріптеу мақсатында ерекше шара ұйымдастырылды. 2025 жылдың қазан айының ортасында Шырғанақ ауылында І.Жұмағұлов атындағы орта мектепте «Қыз өссе – елдің көркі» атты байқау өтті. Бұл игі бастама аудандық «Ішкі саясат» мемлекеттік мекемесінің қолдауымен Алматы облысының есту қабілеті нашар мүгедектердің қоғамдық бірлестігі – «Қамқор-Кеген» ұйымының ұйымдастыруымен жүзеге асты. Шараның басты мақсаты- қазақ халқының салт-дәстүрін, ұлттық құндылықтарын насихаттау, есту қабілеті шектеулі қыз балалардың қоғамдағы орнын арттыру және олардың шығармашылық қабілеттерін дамыту.
Байқауға қатысушылар бірнеше кезең бойынша сынға түсті. Атап айтқанда, «Сәлем сөздің анасы» (Таныстыру), «Шебердің қолы алтын» (Нан жаю), «Білімді қыз-сымбатты қыз» (салт дәстүрге байланысты сұрақ-жауап), «Сымбат пен сән» (сән көрсетілімі) «Тағам әзірлеу сайысы» (тағам әзірлеп көрсету) кезеңдері арқылы өздерінің таланты мен тәрбие көргендігін көрсетті. Қыздар өз қолымен жасаған бұйымдарын, креативті киім үлгілерін, салт- дәстүрге негізделген сұраққа жауап беріп, көрермендердің ыстық ықыласына бөленді.
Іс-шараға мектептерінің мұғалімдері, ата-аналар, жергілікті тұрғындар мен арнайы қонақтар қатысты. Байқау соңында жеңімпаздар мен белсенді қатысушылар түрлі номинациялар бойынша марапатталып, бағалы сыйлықтар табысталды.
Ұйымдастырушылар алдағы уақытта да осындай мазмұнды іс-шаралар жалғасын табатынын айтты.
Қамқорлық пен қолдауға негізделген бұл байқау – ұлттық тәрбие мен ізгіліктің жарқын үлгісі болды.

Фарида Асқарбекқызы,
«Қамқор-Кеген» Алматы облысының есту қабілеті нашар мүгедектердің қоғамдық бірлестігінің басшысы.