Орманшылар құрметке бөленді

Орман шаруашылығы қызметкерлері- ұлт болашағына өлшеусіз үлес қосып жүрген жандар. Олар жылдың төрт мезгілінде табиғат аясында жүріп, орманды бақылап, ағаш егіп, жануарлар дүниесін қорғаумен айналысады. Әсіресе, жазғы өрт қаупі жоғары маусымда олардың жауапкершілігі еселене түседі.

Осы орайда Кеген ауылында Орман шаруашылығы қызметкерлерінің күніне арналған салтанатты жиын өтті.
Сондай-ақ, жиын аясында облыс әкімінің орынбасары Бақытнұр Бақытұлы Кеген орман шаруашылығы мекемесінің жаңа ғимаратын аралап, танысып шықты. Орманшылықтар бойынша орман қоры жеріне орман екпелерін отырғызу, өсіру, орман қорына аудару, Темірлік орманшылығы, уақытша тұқымбақ, Шренк шыршасының тұқымын қолмен себу, өсіру технологиясы жөнінде Кеген орман шаруашылығы мекемесінің директоры Айболат Солтанғазиев облыс әкімінің орынбасары Бақытнұр Бақытұлына баяндап берді. Жаңа ғимараттың кабинеттері мен материалдық-техникалық базасын көрген Бақытнұр Бақытұлы:
– Бүгінгі таңда орман өртінің алдын алу, табиғат жүйесін қадағалау мақсатында 380 млн теңгеге бейне камера орнату жұмыстары атқарылды. Осы айдың аяғында толықтай қосылатын болады. 3,6 млрд теңгеге 9 гектар жерге Қонаев қаласында арнайы тәлімбақ ашылады. Техникамен қамтамасыз ету мақсатында Астана қаласымен бірлесіп, лизинг арқылы техника алу жұмыстары атқарылды. Толық жобасы 250 млн теңгеден асады. Осы жылдың аяғына дейін алынатын техника деп жоспарлап отырмыз. Одан бөлек, келесі жылға арнайы техника алуға жұмыстар атқарылуда. Жаңа салынған ғимарат толығымен жиһаздармен қамтамасыз етілген. 60 жылдай ғимарат қиын жағдайда болған, Кеген ауданының орманшыларына ең басты ғимарат ретінде бекітіп бердік. Орман шаруашылығы қызметкерлеріне 2024 жылы жалақыларын көтеру болған, биылға қарастырылмады. Себебі, жылдан-жылға әр саланың жұмыскерлеріне жалақыны көтеру кестесі бекітілген. Келесі жылға ветеринария саласының жалақысы көтерілетін болады,-дей келе орманшылардың жұмысына сәттілік тілеп, мекеме директорына картина сыйға тарту етті.
Мәдениет үйінде орманшылар бас қосқан салтанатты жиынға облыс әкімінің орынбасары Бақытнұр Бақытұлы, облыстық табиғи ресурстар және табиғатты пайдалануды реттеу басқармасының басшысы Қанат Ақылұлы, Орман шаруашылығы және жануарлар дүниесі аумақтық инспекциясының басшысы Нұркен Исатайұлы, қоғам қайраткері Тұрарбек Мәжілұлы, аудан әкімі Нұрбақыт Теңізбаев, аудандық маслихат төрағасы Алмасбек Нұғыман, Кеген орман шаруашылығы мекемесінің директоры Айболат Солтанғазиев, осы салада ұзақ уақыт еңбек еткен ардагерлер мен бүгінгі таңда жұмыс жасап жүрген орманшылар, мекеме басшылары қатысты.
Салтанатты жиында Мемлекеттік гимн орындалып, жиынға қатысушылар Кеген орман шаруашылығы мекемесінің қызметі мен жетістіктері туралы әзерленген бейнероликті тамашалады.
Алғашқы құттықтау сөз алған облыс әкімінің орынбасары Бақытнұр Бақытұлы орман саласының ел экологиясы үшін маңыздылығын атап өтті.
– Кеген ауданында келіп, орманшылардың кәсіби мерекесіне орай, арнайы шараға қатысып отырмыз. Орманшы-табиғатты сүйіп қана қоймай, оны сақтай білетін адам. Мемлекет басшысының 2 миллиард ағаш отырғызу тапсырмасын орындауда Алматы облысы ерекше белсенділік танытып келеді,-дей келе орман шаруашылығы саласында ұзақ жылдар бойы адал еңбек етіп, табиғатты қорғауға зор үлес қосқан қызметкерлер Министрлік пен облыс әкімі атынан Құрмет грамоталары мен Алғыс хаттармен, сондай-ақ «Қазақстан орманын қорғаудағы мінсіз қызметі үшін» төсбелгілерімен марапатталды. Барлығы 25 орманшы І, ІІ және ІІІ дәрежелі төсбелгі иегері атанды.
Басқосуда аудан әкімі Нұрбақыт Молдахметұлы құттықтау сөз сөйлеп, ізгі лебізін жеткізді:
– Бүгін біз табиғаттың ажырамас бөлігі-орман байлығын қорғап, сақтау мен көбейту ісіне бар ғұмырын арнаған жандардың кәсіби мерекесін атап өтудеміз. Орман-тек жасыл желек емес, ол-тіршіліктің күретамыры, табиғаттың тынысы. Ата-бабамыз «Атадан мал қалғанша, тал қалсын» деп бекер айтпаған. Өйткені орман- экологиялық тепе-теңдіктің кепілі, елдің экологиялық қауіпсіздігін сақтайтын табиғи қалқан. Қай кезеңде болсын, орманды сақтау-табиғатты аялау, ұлттың келешегіне бағытталған игі іс болып қала береді. Орман шаруашылығы мекемелері мен табиғатты қорғау инспекциялары жыл сайын мыңдаған түп көшет отырғызып, жасыл аймақ көлемін арттыруда,- дей келе орман шаруашылығы қызметкерлерімен сала ардагерлерін кәсіби мерекелерімен құттықтады.
Шара барысында облыстық табиғи ресурстар және табиғатты пайдалануды реттеу басқармасының басшысы Қанат Ақылұлы, Орман шаруашылығы және жануарлар дүниесі аумақтық инспекциясының басшысы Нұркен Исатайұлы, қоғам қайраткері Тұрарбек Мәжілұлы құттықтау сөз сөйлеп, орманшыларға жылы лебіздерін білдірді.
Туған өлкенің орман байлығын сақтау жолында табанды еңбек етіп, 40 жыл өмірін табиғатқа арнаған сақа орманшы Сағатжан Қасымбековтың айтуынша, орман шаруашылығы саласының басты міндеті орманды қорғау мен сақтау, табиғи тепе-теңдікті қалпына келтіру, орман өсімдіктерінің өсімін арттыру және ондағы жануарлар мен құстардың мекенін қорғау. Бұл- жай ғана жұмыс емес, табиғат алдындағы аманат, ұлт алдындағы борыш санайды.
– Бұл салада жауапкершілік мол, көшеттерді кішкентайынан қорғап, өсіріп, баптау керек. Күз кезінде орманды өрттен қорғау жұмыстары бар. Жас мамандарға айтарым, ерінбей еңбек етіп, жақсы жұмыс жасау керек. Екі баламды осы орман шаруашылығында оқытып жатырмын. Біреуі дипломын алды, енді біреуі биыл оқуын аяқтайды,- дейді ардагер орманшы.
Айболат Солтанғазиев, Кеген орман шаруашылығы мекемесінің директоры:
– 2017 жылы Үкіметтің қаулысымен Орман шаруашылығы қызметкерлерінің күні бекітілген. Бүгінгі таңда кәсіби мерекені Кеген орман шаруашылығында атап өтіп жатырмыз. «Жұмысшы мамандықтар» жылына орай, биыл мекемемізге жаңа ғимарат салынды. Біздің негізгі мақсатымыз орманды қорғау, молықтыру, өсіру. Мекеме 1946 жылы құрылған. Жер көлемі 90 мың гектар, оның ішінде орманды алқабы 27 мың гектар. Екі тұқымбақ бар, біреуі уақытша, біреуі 54 гектар Жалағаш орманшылығында орналасқан базалық тұқымбақ. Кеген орманшылығы 15 гектардан 50 гектар тау бөктерлеріне екпе көшеттері отырғызылады. Базалық тұқымбақта төрт жыл өсірілген Шренка шыршасын тау бөктеріне апарып өсіреміз. Жоғарыда айтып өткеніміздей, негізгі міндетіміздің бірі орманды молықтыру. Жаңа ғимаратты салу жұмыстары 2024 жылдың қазан айында басталған, 2025 жылдың қыркүйек айында қолданысқа берілді. Атап өту керек, Жалағаш орманшылығындағы кеңсе облыстық бюджеттен қаржы бөлініп, ағымдағы жөндеуден өтті. Мекеме де жалпы 109 қызметкер еңбек етуде. Жалағаш, Екіаша, Темірлік, Қарқара, Ұзынбұлақ орманшылықтары бар,-деді ол.
Шара соңында аудан өнерпаздары мереке иелеріне арнап ән шырқап, көтеріңкі көңіл-күй сыйлады.
Орманшылардың арқасында еліміздің орман қоры ұлғайып, табиғат байлығы көздің қарашығындай сақталып келеді. Себебі орманды қорғау-туған жерді қорғау. Сондықтан, әрбір азамат табиғатқа жанашырлықпен қарап, жасыл ағаш отырғызудан тартынбауы керек. Бүгін еккен ағаш-ертеңгі ұрпақтың саясы екенін естен шығармайық!

Дәурен ЕРМЕКБАЙ,
Кеген ауылы.