Сахна саңлағы – Сәмиға Әлдекенова
Кеген аудандық мәдениет үйі жанындағы Кеген халық театрының белді мүшесі, көп жылдық еңбек жолын өнерге арнаған “Мәдениет саласының үздігі” Сәмиға Мұсағалиева – өңіріміздегі мәдениет саласының дамуына сүбелі үлес қосып жүрген ардақты азаматтардың бірі.
Сәмиға Әлдекенова 1964 жылы Жетісу облысы, Сарқан ауданы, Бақалы ауылында дүниеге келген. Өнерге жаны жақын жас қыздың болашақ өмірі Кеген өңірімен тығыз байланысты болды. Ол өзінің еңбек жолын 1985 жылы Кеген ауданы, Тоғызбұлақ колхозындағы халық театрында әртіс болып бастап, содан бері сахнадан қол үзбей келеді.
Ұзақ жылдар бойы Сәмиға апай Кеген аудандық мәдениет бөлімінде автоклуб меңгерушісі, әдіскер, көркемдік жетекші, Тасашы ауылдық мәдениет үйінің директоры, аудандық мәдениет үйінің дирижері қызметтерін абыроймен атқарды. Қазіргі таңда Кеген халық театрының әртісі ретінде өнер көрсетіп, көпшілік көңілінен шығып жүр.
1987 жылы театр ұжымы сахналаған Тәкен Әліпбаевтың «Даладағы дүбір» спектаклі үлкен жетістікке жетіп, «Үлкен алтын» медальмен марапатталды. Бұл – Сәмиға сынды кәсіби әртістердің еңбегінің жемісі еді.
Кеген халық театры бүгінде Бүкілодақтық, халықаралық және республикалық байқаулардың бірнеше мәрте жеңімпазы атанып отыр. 1998 жылы «Алмалы-98» ән байқауында эстрада ән номинациясы бойынша бас жүлдені жеңіп алуы – Сәмиға Әлдекенованың өнердегі өрісін тағы бір дәлелдеді.
Ол облыс әкімі Серік Үмбетовтың «Құрмет» грамотасына, 2011 жылы «Тәуелсіздікке 20 жыл» мерекелік төсбелгісіне, 2018 жылы Астананың 20 жылдығы мерекелік медалімен, 2019 жылы “Муза жұлдызы” медалінің иегір атанды. 2020 жылы “Еңбек даңқы” төсбелгісі Қазақстандық салалық мәдениет, спорт, туризм және ақпарат қызметкерлерінің кәсіптік одағының төсбелгісімен, 2021 жылы “Мәдениет саласының үздігі” төсбелгісінің, 2024 жылы «Еңбек сіңірген қызметкері», 2025 жылы «Еңбек ардагері» төсбелгілеріне ие болды. Бұл – ұзақ жылғы адал еңбектің лайықты бағасы.
Мәдениет саласында 40 жылға жуық еңбек етіп келе жатқан Сәмиға Мұсағалиқызы– бүгінгі жас ұрпаққа үлгі, еңбек пен өнерді ұштастыра білген тұлға. Жолдасы ертеректе қайтыс болғанына қарамастан, 3 баланы тәрбиелеп өсіріп, бүгінде 5 немеренің қызығына бөленіп отыр.
Сәмиға апайдың сахнадағы әр рөлі, аудандық мәдени шараларда атқарған қызметі – халқымыздың рухани байлығына қосылған үлес. Ол– тек әртіс қана емес, ел мәдениетінің шырақшысы.
Жез көмей Сәмиға Әлдекенова қараша айының бірінші жұлдызында асқаралы 61 жасқа толып отыр. Мерейлі мереке қарсаңында әуезді әнімен құлақтардың құрышын қандырып, ауданның өркендеу жолында үздіксіз еңбек етіп келе жатқан Сәмиға Мұсағалиқызына мықты денсаулық пен абырой бигінің мәртебесінен аласармауды тілейміз.
Еткең еңбегіңіздің жемісі мен жеңісі елдің ыстық ықыласы мен теңдессіз құрметі болашағыңызға нұрын төксін. Ұрпағыңызбен мың жасап, сыйқырлы үніңіздің әуезі әлемді шарласын демекпіз.
