Тағзым жасалды

    Ауданның орталығында 31 мамыр – саяси қуғын-сүргін құрбандарын еске алу күні лайықты аталып өтті. 1997 жылы Тұңғыш Президентіміз Н. Назарбаевтың Жарлығымен 31 мамыр – саяси қуғын-сүргін құрбандарын еске алу күні болып жарияланған болатын. Содан бері биыл 22 рет аталып өтілуде.  Рас, Ленин мен Сталиннің кезінде контрреволюциялық әрекетпен айыпталып 3 777 380 адам жазықсыз сотталып, олардың ішінен 642 980 адам өлім жазасына кесілген. 2 369 220 адам 25 жылдан бастап төмен мерзімге түрмелер мен лагерь-колонияларға қамалды. 1937-1938 жылдары Қазақстанда 118 мың сотталып, 25 мың адам ату жазасына кесілген. Тәуелсіздік жылдары 146,5 мың кінәсіз жазаланған Отандастарымыздың аттары жазылған 14 «Аза» кітабы жарық көрді. 340 мыңнан астам адам ақталды.    Саяси қуғын-сүргін құрбандарын еске алу күні дәл осыған арналып ортатылған ескерткіштің алдында болды. Аудан әкімі Талғат Байедилов бастаған зиялы қауым өкілдері ескерткішке гүл шоқтарын қойып, тағзым жасады. Содан соң аудан әкімі Т. Байедилов, аудандық мәслихаттың хатшысы Н. Советов, қуғын-сүргін құрбанының ұрпағы болып келетін аудандық қоғамдық кеңестің төрағасы Х. Зықаев, №3 Кеген орта мектебінің озат оқушысы Б. Салимова сөз сөйлеп, халқымызды қан жылатып, қырғынға ұшыратқан саясат қайта оралмасын, жазықсыз жазаланғандардың жандары жаннатта болсын, бейбіт күн мәңгі орнасын деген тілек-ниеттерін білдірді. Ауданның бас имамы Асқар Сығаев құрбандарға арнап құран бағыштады. Ақын Шеризат Мекебаев зұлмат күнге арнаған өлеңін оқыды. Кеген халық театрының ұжымы шағын сахналық көріністерін алға тартты.

                                                      Қ. Біржансал,  Кеген ауылы.