Ұстаз – ұлттың рухани шамшырағы

Мен үшін әр пәннің орны ерекше. Бірақ жүрегіме жол тапқан қос бірдей аяулы ұстазым бар. Олар– қазақ тілі мен әдебиеті пәнінің мұғалімі Айжан апай және ағылшын тілі пәнінің мұғалімі Ақбөпе апай. Бұл кісілердің әр сабағы мен үшін тек білім емес, рухани азық, шабыт пен сенімнің қайнар көзіне айналған
Айжан апайдың әр сабағы – поэзиямен өрілген өмір сабақтары іспетті. Ол кісі тек грамматиканы үйретіп қана қоймай, әр шығарманың мазмұнына терең үңілуге, кейіпкерлердің жан дүниесін түсінуге жетелейді. Абайдың асыл сөздерін, Мұқағалидың мұңды жырларын бізге жан- тәнімен жеткізетін Айжан апайдың шексіз еңбегіне алғысым шексіз.
Оның сабағына қатысқан сайын, ана тілімнің шұрайлығына, әдебиетіміздің тереңдігіне сүйсінемін. Айжан апай маған сөз қадірін түсінуді, ойымды көркем жеткізе білуді үйретті.
Ағылшын тілі – заман талабы. Бұл тілді меңгеру жолында маған бағыт берген, сенім ұялатқан ұстаз– Ақбөпе апай. Оның сабағында әр сәт қызықты өтеді: түрлі ойындар, диалогтар, шығармашылық тапсырмалар арқылы біз тілді еркін меңгеріп келеміз. Ақбөпе апай әр оқушының қабілетіне ерекше көңіл бөліп, ешкімді сырт қалдырмайды. Ол бізге тек тілді ғана емес, мәдениетті де, әлемге ашық көзқарасты да үйретеді. Мұғаліміміздің шетел әдебиетінен келтіретін мысалдары, мотивациялық сөздері бізді алға жетелейді.
Ыдырыс Көшкінов орта мектебіндегі әр ұстаз– менің білім жолымдағы жарық жұлдыздарым. Олар өз ісінің шебері ғана емес, үлкен жүректі, шәкіртіне шын жанашырлықпен қарайтын мейірімді тұлғалар. Менің әрбір жетістігім – олардың маған сіңірген еңбегінің жемісі.
Мектептегі алтын шақтарымды көркейткен, болашағыма бағыт берген ұстаздарыма шын жүректен алғыс білдіремін. Сіздердей мұғалімдер барда білім де, тәрбие де – биікте болары сөзсіз!

Марат Шынар Мәуленқызы,
Ыдырыс Көшкінов атындағы
орта мектебінің 9-сынып оқушысы.