Еңбегі еленген арулар

Аудандық Мәдениет үйінде «Атамекен» кәсіпкерлік палатасы Кеген аудандық филиалы және Іскер әйелдер кеңесінің ұйымдастыруымен алғаш рет ерекше форматтағы шара «Әйел кәсіпкерлігі: табыс пен даму жолы» атты аудандық іскер әйелдер форумы өтті.

Форум алдында кәсіпкер әйелдердің жетістігін көрсететін көрме ұйымдастырылды. Жиналушылар назарына нәзік жандылардың қолынан шыққан тұрмысқа қажетті бұйымдар, кондитерлік өнімдер, бал ара өнімдері мен сүт өнімдері ұсынылды. Жәрмеңкеге ұласқан көрме көпті қызықтырды.
Шара-іскер әйелдердің қоғамдағы рөлін арттыру, іскер, белсенді, табысты әйелдердің тәжірибесін насихаттау, олардың жетістіктерін үлгі ету және әртүрлі салада жемісті еңбек етіп жүрген қарапайым жұмысшы әйелдерді дәріптеу мақсатында ұйымдастырылған.
Форумға аудан әкімі Нұрбақыт Теңізбаев, Алматы облысы кәсіпкерлер палатасының іскер әйелдер кеңесінің төрайымы Ботабекова Ләззат Қайсарқызы, Алматы облысының кәсіпкерлер палатасы директорының орынбасары Жанна Қырғызалықызы, Алматы облысы «AMANAT» партиясы жанынан құрылған Әйелдер қанатының төрайымы Меруерт Сағындыққызы, әр салада еңбек етіп жүрген іскер әйелдер, мекеме басшылары, іскер әйелдер қауымдастығынан бірқатар делегация өкілдері қатысты.
Жиынды Алматы облысының кәсіпкерлер палатасы директорының орынбасары Жанна Қырғызалықызы ашып, жүргізіп отырды.
– Бүгінгі бас қосуымыз ерекше маңызы бар шаралардың бірі. Бұл жиын өңіріміздегі іскер әйелдердің басын қосып, қоғамдағы әйелдердің белсенділігі мен үлесінің қаншалықты жоғары екенін көрсететін айрықша мүмкіндік,- деп бастады аудан әкімі құттықтауында. -Ауданымызда іскер әйелдер қатары жылдан-жылға артып келеді. Қолөнер, ауыл шаруашылығы, шағын және орта бизнес, білім мен мәдениет, әлеуметтік сала қай бағытта болмасын әйелдер қауымының табысты еңбегін ерекше атауға болады. Олар тек өз отбасыларына ғана емес, тұтас қоғамға пайдасын тигізіп, жұмыс орындарын ашып, жаңа мүмкіндңктер қалыптастыруда. Бұл-нағыз отансүйгіштік пен еңбекқорлықтың үлгісі. Іскер әйел-ол тек табысты кәсіпкер емес, ол-ана, ол-отбасы мен қоғамның тірегі. Сіздердің еңбектеріңіз жас ұрпақтың бойына жігер беріп, ауданымыздың өркендеуіне өз үлесін қосып отыр. Бүгінгі форумның мәні ерекше. Бұл алаңда сіздер өз тәжірибелеріңізбен бөлісіп, жаңа идеяларды ортаға салып, серіктестік қарым-қатынас орнатасыздар. Бұл- ортақ табыстың, ынтымақтастықтың кепілі,- дей келе кәсіпкерлік саласында үлес қосып жүрген нәзік жандыларды аудан әкімі Нұрбақыт Молдахметұлы құттықтап, өз алғыс хаттарымен марапаттады.
Ләззат Қайсарқызы, Алматы облысы кәсіпкерлер палатасының іскер әйелдер кеңесінің төрайымы:
– Бүгін біз осында әйелдердің бірлігімен табандылығын, еңбегімен ерік- жігерінің мерекесіне жиналып отырмыз. Бұл форум тек іскер әйелдердің кездесуі емес, бұл жүрегімен, ойымен, ісімен елге қызмет етіп жүрген әйелдердің бас қосуы. Менің өмір жолым ауылдан басталды. Таудың етегінде, қарапайым отбасында дүниеге келдім, бірақ бала күнімнен ата-анам маған бір нәрсені үйретті. «Еңбек еткен адам ешқашан жеңілмейді» деді. Сол сенім мені өмір бойы жетеледі. 17 жасымнан бастап жұмыс ісдедім,- деген ол облыстық кәсіпкерлер палатасы атынан бірқатар іскер әйелдерге Алғас хаттарды табыс етті.
Кеген жеріндегі басқосу- еңбекқорлық пен іскерлік, табандылық пен төзімділік секілді асыл қасиеттерді бойына сіңірген кәсіпкер әйелдер қауымының қоғамдағы орнын айшықтайтын айтулы шара екенін ерекше атап өтті келген қонақтар.
– Іскер әйелдер қауымдастығы Қазақстанда 30 жыл бұрын құрылды. Бүгін Кеген ауданындағы басқосуға келдік. Облыстық іскер әйелдер қауымдастық ортасы кеңейіп жатыр. Жоғары деңгейде ұйымдастырылған бүгінгі форум әсері мол кездесу болды, – деді Алматы облысы «AMANAT» партиясы жанынан құрылған Әйелдер қанатының төрайымы Меруерт Сағындыққызы.
Жиын барысында аудандық аналар кеңесінің төрайымы Бақытгүл Демежанқызы, кондитер жұмысын дамытып келе жатқан жеке кәсіпкер Ақзер Болатбекқызы, маслихат төрағасы Алмасбек Нұғыман, аудандық кәсіпкерлер палатасының әскер әйелдер кеңесінің төрайымы, жеке кәсіпкер Бақытгүл Оспанқызы әйелдердің еңбек нарығындағы белсенділігі, олардың өзін-өзі дамытудағы мүмкіндіктері туралы сөз қозғап, өздерінің ой-пікірлерін ортаға салды.
Сонымен қатар, отбасындағы үйлесімділік, бала тәрбиесі, жұмыс пен отбасы арасындағы тепе-теңдік сынды маңызды тақырыптар қозғалды.
-Форумға келіп, бірінші рет қатысып отырмыз. Өте жоғары деңгейде, жақсы ұйымдастырылған. Бәрі ұнап жатыр. Көрмеге өзіміздің кондитерлік өнімдерімізді әкеліп, таныстыру үстіндеміз. Тәттілер пісірумен айналысамыз. Барша әйелдар қауымына сәттілік тілеймін!-деген жас кәсіпкер Ақзер Болатбекқызы мұндай мазмұнды кездесулер әйелдердің қоғамдағы орнын арттырып қана қоймай, өзара ынтымақтастықты нығайтуға да ықпал ететіндігін тілге тиек етті.
Форум соңында аудандық кәсіпкерлер палатасының әскер әйелдер кеңесінің төрайымы Бақытгүл Оспанқызы қатысушыларға алғысын білдіріп, осындай кездесулердің жиі өткізіліп тұруына тілектестік білдірді.
Форумға қатысушылар аталмыш шара басталған жұмыстарды жалғастыруға, жетістіктерге жол ашып, жаңа серпін беретініне сенім артты. Сондай-ақ бір-бірімен өзара байланыс орнатып, болашақта бірлесіп жұмыс атқаруға дайын екендігін, форум Райымбек ауданында жалғасын табатындығын атап өтті.
Кеш соңы мерекелік концертке жалғасты.

Дәурен ЕРМЕКБАЙ
Кеген ауылы.