Халықпен бірге – уақытпен жарысқан пошта қызметі

9 қазан – Дүниежүзілік пошта күні.

Бұл күн – ғасырлар бойы уақытпен жарысып, ел мен елді, халық пен халықты, адам мен адамды жалғап келе жатқан поштаның төл мерекесі. Әлемнің түкпір-түкпірінде аталатын бұл күн Біріккен Ұлттар Ұйымының арнайы шешімімен 1969 жылдан бері ресми халықаралық мереке ретінде бекітілген. Ал оның түп тамыры 1874 жылы 9 қазанда Швейцарияның Берн қаласында құрылған Дүниежүзілік пошта одағынан бастау алады.
Поштаның қоғамдағы рөлі орасан зор десек артық айтқандық емес. Тарихқа көз жүгіртсек, пошта– тек хат-хабар жеткізуші ғана емес, мемлекет дамуының маңызды тетігіне айналған сала. Қаншама ғасыр бұрын шабармандар арқылы хат тасымалданған кезеңдерден бастап, бүгінгі цифрлы технологияға негізделген пошта қызметі – қоғам өмірінің ажырамас бөлігі. Қазақстанда да пошта саласы Тәуелсіздікпен бірге жаңа тыныс алып, бірге жасап келеді. Еліміз 1992 жылы Дүниежүзілік пошта одағына мүше болып, бұл саланың халықаралық деңгейде дамуына жол ашты. Қазір елімізде «Қазпошта» АҚ-ы арқылы қала мен даланың, тау мен шөлдің арасына хат, сәлемдеме, зейнетақы, газет-журнал таратып, халыққа қаржылық, логистикалық және цифрлы қызмет көрсетуде.
Ауданда қашан да пошта саласының орны бөлек. Аудан орталығында орналасқан пошта байланыс торабы мен ауылдық бөлімшелерде бірнеше ондаған қызметкер тынымсыз еңбек етіп келеді. Олар үшін таңертеңгі пошта қызметі мен кешкі халықтың ризашылығы – ең үлкен марапат. Бүгінде Кеген аудандық пошта байланыс торабының басшысы Меруерт Жырғалова Тұрбекқызы басқаратын мекеме – өңірдегі ірі пошта орталығының бірі. Қатардағы операторлар мен хат тасушылар, кассирлер мен инкассаторлар – барлығы да поштаның абыройын көтеріп, сапалы қызмет көрсету жолында тер төгуде. Аудандық пошта байланыс торабында 57 адам тұрақты жұмыс істейді. Олардың қатарында ұзақ жылдар бойы алды 36 жыл осы мекемеде жұмыс істеп, халыққа үнемі қызмет етіп келеді. Атап айтар болсақ сұрыптаушы Бокамбаева Роза, бас кассир Илипбаева Гүлбану, соңынан бақылау бөлімінің маманы Нұрғожаев Сәуле, операторлар Асылбекова Баян, Нұрбатырқызы Гүлден, инкассатор Кебенбаев Қуатбек, жүргізуші-инкассатор Нақысбеков Нұрлан, Желдікбаев Дархан, ауылдық байланыс бөлімшелерінде Сарымбетов Анархан, Исаева Рахатсынды тәжірибелі мамандар бар. Әрқайсысы өз ісінің шебері, поштаның сенімді тірегі. Пошташылар Заманбекова Зинахан, Кегенбаева Анаргүл, т.б ел үшін еңбек етіп, алғысқа бөленуде. Еңбек ақының аздығына қарамастан хат-хабар таратып жүрген барлық пошташылардыңда еңбегі зор. Халық пен поштаның байланысы – үзілмес алтын көпір десек артық етпес.Бүгінгі цифрлы дәуірде пошта саласы да жаңғырып, заман талабына бейімделіп келеді. Ауылдағы ағайын әлі күнге дейін газет-журналын пошта арқылы оқиды, зейнетақысын алады, қалаға хат-сәлем сауқат жеткізеді. Бұл – поштаға деген сенімнің белгісі.
9 қазан – пошта қызметкерлері үшін мақтаныш пен мерейге толы күн. Бұл күні елдің түкпір-түкпірінде еңбек етіп жүрген пошта мамандарына алғыс білдіру – әрбір тұрғынның азаматтық парызы. Пошталық қызметтің сапалы жұмыс істеуі үшін қызметкерлердің жауапкершілігі мен адалдығы – басты шарт.
«Қарты бар ел – қазыналы ел»* демекші, аға буын пошташылардың да еңбегі ұмытылмайды. Алда келе жатқан төл мерекемен барлық пошта қызметкерлерін құттықтай отырып, еңбектеріне табыс тілейміз.
Лаура Мұхаметқали.