Салауатты өмір салтын насихаттауға серпін берді
Ел Президенті Қасым-Жомарт Тоқаев: «Спорт- халықтың денсаулығы мен бірлігінің кепілі. Әрбір азамат спортпен айналысу арқылы тек денсаулығын нығайтып қана қоймай, елге жігер, қоғамға серпін сыйлайды. Бұқаралық спорт – ұлт болашағына салынған инвестиция»,- деп атап өткен болатын. Мемлекет басшысының осы сөзі бүгінде ел өңірлерінде нақты істермен көрініс тауып отыр. Соның жарқын дәлелі – Кеген жастарының бастамасымен өткен «Кеген марафон- 2025»ауқымды шарасы.
Аудан көлемінде алғаш ұйымдастырылған бұл марафон – жай ғана жарыс емес, салауатты өмір салтын насихаттауға, жастарды спортқа баулуға, ел ішіндегі бірлікті арттыруға бағытталған үлкен бастама.
Шараның салтанатты ашылуында аудан әкімі, Олимпиада жүлдегері Нұрбақыт Теңізбаев сөз сөйлеп:
«Бұл тек жарыс қана емес, жастардың жігерін шыңдайтын, халықты спортқа үндейтін үлкен қадам. Әр тұрғын өз денсаулығына жауапты. Біз осындай шаралар арқылы қоғамға үлгі болуымыз керек», – деп, қатысушыларға сәттілік тіледі.
Сондай-ақ, аудандық төтенше жағдайлар бөлімінің бас маманы, гир көтеруден Азия мен әлем чемпионаттарының жүлдегері Қадыр Дәурен де өзінің спорттық тәжірибесімен бөлісіп, жастарға мотивация берді.
Марафонға батасын беріп, ағалық ізгі тілегін білдірген Кеген ауданының Құрметті азаматы, ардагер спортшы, ақын Шеризат Мекебаев:
«Жігерлі ел – мықты ел. Денсаулығы мықты ұрпақ – жарқын болашақ кепілі. Сендер елдің үмітісіңдер!»– деп қатысушыларды сәттілік тіледі.
Марафонның негізгі мақсаты – ел ішіндегі рухты ояту болмақ.
Марафон бірнеше санат бойынша ұйымдастырылып, жастар, ардагерлер және әуесқой спортшылар бақтарын сынады. Қатысушылар арасынан ерекше белсенділік танытқандар марапатталып, арнайы сыйлықтар мен дипломдарға ие болды.
Бұл марафон- салауатты өмір салтын насихаттаумен қатар, жастардың белсенділігін арттырып, көпшілікті спортқа үндеуге арналған маңызды қадам болмақ.
Қатысушылар түрлі қашықтықтар бойынша өз шеберліктерін көрсетті.
5 км – Ерлер арасында
1 орын – Базарымбетов Мақсат
2 орын – Салимханов Олжас
3 орын – Жотабай Мақсат
5 км – Қыздар арасында
1 орын – Құрманбаева Роза
2 орын – Сарсенбиева Назым
3 орын – Ринатқызы Лашын
10 км – 16-35 жас аралығы
1 орын – Бақытұлы Айбар
2 орын – Елікбай Әділет
3 орын – Нұржігіт Тілеубай иеленді.
Жеңімпаздарға аудан әкімінің арнайы марапаттары мен бағалы сыйлықтары табыс етілді. Бұл марафон – жай ғана сайыс емес, ел ішіндегі ынтымақ пен сергек өмірге шақырудың бір көрінісі болды.
