Ақ жол тіледі
![](https://qarqaragazeti.kz/wp-content/uploads/2019/07/сонгы-.jpg)
Қасиетті Рамазан айына тап келген биылғы соңғы қоңырау салтанаты ауданымызда лайықты аталып өтілді. Бұл жері құнарлы елі шырайлы Ұзынбұлақ ауылында да есте қаларлықтай болды. Дәл сол күні аспаннан нұр төгіліп тұрды. Мұны құдыреті күшті Алланың биыл мектептен қанаттанғалы отырған түлектерге деген жүрек жылуы мен жан нұрындай бағаладық. Айтулы шараға облыстық Қазақстан халқы Ассамблеясы төрағысының орынбасары, хатшылық меңгерушісі Ғабит Тұрсынбай, ауданымыздың әкімі Талғат Байедилов қатысып, жүрекжарды лебіздерін жеткізді. Жылды жемісті қорытындылап отырған ұстаздар қауымына зор денсаулық, шығармашылық табыстар тілей отырып, биылғы түлектердің жолдары түзу, өмірлері жарқын болсын деген жылы ниеттерін жеткізді. Қимастыққа толы сәттерде Ы.Көшкінов атындағы орта мектептің директоры Абай Хасенов білім ордасының игілікті істерін айтып, мектептің озат ұстаздары мен оқушыларын марапаттады. «Инемен құдық қазғандай»-еңбектің жемісі мен орынды мерей екені даусыз. Мектептің ұлағатты ұстазы Нұргүл Төлекова ҚР «Білім беру ісінің үздігі» атанды. Өнегелі мұғалімдер Гүлнәр Сәрсебекова мен Гүлнара Әлімғожаева «Ұлағатты ұстаз» төс белгісімен марапатталды. Сол сияқты оқушылар арасынан биылғы республикалық Мұқағали оқулары байқауында 3 орын алған Марал Мақсатқызы, бокстан жасөсіпірімдер арасында өткен республикалық турнирде 1 орын алып, чемпион болған Медеу Әбдіхалық, бокстан жасөспірімдер арасындағы аудандық ашық біріншілікте 1 орын алған Сабина Тұрғанбек, «Зерде» республикалық конкурсының облыстық кезеңінде 3 орын алған Ақбөпе Әбіл, облыстық Абай оқуларында 3 орынды иеленген Ақерке Нұрақын лайықты марапатталды. Осы күні түлектердің сынып жетекшісі Жаңыл Әнәпияева, ата-аналар атынан Бақберген Мамытқұлов, мектеп бітіруші түлектер атынан Ақбота Серік сөз алып, ізгі тілек-ниеттерін білдірді. Әнмен, әсерлі вальспен ажарланған кеште 1 сыныптың үздік оқушысы Аяжан Бекет пен 11 сынып оқушысы Дәулет Дәуленхан оқу жылының соңғы қоңырау үнін жеткізді.
Қ. Сатыпалды, Ы. Көшкінов атындағы орта мектеп.