Алматы облысында жылыту маусымына дайындық: Қауіпсіздік — басты назарда

Алматы облысында жылыту маусымына дайындық: Қауіпсіздік — басты назарда

Алматы облысында қысқы маусым қарсаңында өрт қауіпсіздігін қамтамасыз етуге бағытталған алдын алу шаралары белсенді түрде жүргізілуде. Әсіресе, жеке тұрғын үйлерде тұратын, пешпен жылынатын немесе ескі электр құрылғыларын пайдаланатын отбасылар арасында түсіндіру жұмыстары күшейтілді.

Өңірлік коммуникациялар қызметінің ұйымдастыруымен өткен кезекті көшпелі баспасөз мәслихаты Қонаев қаласының «Құрылысшы» шағын ауданында өтті. Іс-шара барысында мамандар тұрғындармен кездесіп, жылыту маусымындағы қауіпсіздік ережелерін түсіндіріп, улы газды анықтайтын датчиктер орнатты.

Алматы облысы Төтенше жағдайлар департаменті Мемлекеттік өрт бақылау басқармасының басшысы, азаматтық қорғау подполковнигі Арман Макеновтың айтуынша, өңірде өрттердің басым көпшілігі — тұрмыстық электр құралдарын дұрыс пайдаланбаудан және пештің ақауларынан туындайды.

Қазіргі таңда біз үшін басты міндет – тұрғын үйлерде болатын төтенше жағдайлардың алдын алу. Әсіресе, әлеуметтік әлсіз отбасылардың үйлерінде улы газбен улану қаупі жоғары. Сол себепті түсіндіру жұмыстарымен қатар, газ датчиктерін орнату арқылы нақты көмек көрсетіп жатырмыз, – деді Арман Миржанович.

Аталған іс-шараға AMANAT партиясының жастар қанаты – «Жастар рухы» еріктілері де белсене атсалысты. Олар мамандармен бірге үйлерді аралап, улы газ датчиктерін орнатып, жадынамалар таратты. Сондай-ақ, әр үйге кіріп, тұрғындарға қарапайым қауіпсіздік талаптарын түсіндірді.

Мамандар тұрғындарға пеш мұржасын уақытылы тазалау, қолдан жасалған жылытқыштарды пайдаланбау, электр сымдарының жағдайын үнемі тексеріп отыру сынды кеңестер берді. Сондай-ақ, розеткаларды шамадан тыс жүктемеу керектігін ескертті.

Баспасөз іс-шарасы бірнеше үйге датчик орнатумен және тұрғындармен ашық әңгіме түріндегі кездесумен аяқталды. Ұйымдастырушылардың айтуынша, мұндай жұмыстар облыстың басқа да елді мекендерінде жалғасатын болады.

Алматы облысында қолға алынған бұл бастама – тек техникалық шара ғана емес, ең алдымен қауіпсіздік мәдениетін қалыптастыруға бағытталған жүйелі жұмыс. Қарапайым ережелерді сақтау арқылы әрбір отбасы өз үйінің амандығын қамтамасыз ете алады.

Ұмытпаңыз: қауіпсіздік — әр азаматтың жауапкершілігі.