Сыбайлас жемқорлық – қоғам дамуына тұсау
Сыбайлас жемқорлық – ел болашағына қауіп төндіретін ең өткір қоғамдық мәселелердің бірі. Бұл – мемлекеттік басқару жүйесіндегі әділетсіздікке жол ашатын, азаматтардың құқықтары мен еркіндігін шектейтін, мемлекеттің даму қарқынын тежейтін қауіпті дерт.
Сыбайлас жемқорлықтың негізгі белгілері– пара беру, пара алу, қызметтік өкілеттілікті асыра пайдалану, таныстықпен шешілетін мәселелер және мемлекеттік ресурстарды жымқыру. Бұл көріністер тек жеке адамның абыройына ғана емес, тұтас қоғамға зиянын тигізеді.
Сыбайлас жемқорлықтың салдары:
– Қоғамда әділетсіздік орнайды;
– Адал еңбек бағаланбайды;
– Жастардың болашаққа деген сенімі азаяды;
– Экономикалық дамуға үлкен кедергі келтіріледі;
– Мемлекеттік жобалар сапасыз жүзеге асырылады.
Бір өкініштісі, кей жағдайларда қарапайым азаматтар да осы жүйеге бейімделіп, «басқаша болмайды» деген оймен бұған бейжай қарайды. Алайда бұл немқұрайлық қоғамды іштей ірітіп, әділеттілік пен тәртіпке селкеу түсіреді.
Мемлекеттің бұл бағыттағы әрекеттері
Елімізде сыбайлас жемқорлыққа қарсы көптеген заңнамалық, институционалдық қадамдар жасалуда. ҚР Сыбайлас жемқорлыққа қарсы іс-қимыл агенттігінің жұмысы, мемлекеттік қызметте ашықтық қағидаттарының енгізілуі, «Адал Ұрпақ», «Саналы Ұрпақ», «Ашық әкімдік» жобалары– барлығы қоғамда әділдік пен ашықтық орнатуға бағытталған.
Мектеп қабырғасынан бастап жастарға адалдық, әділеттілік, парасаттылық туралы тәрбие берілуі тиіс. «Баланы жастан…» демекші, рухани иммунитетті қалыптастыру– болашақ жемқорлықсыз қоғамның кепілі.
Қоғамдық белсенділік – басты қару
Сыбайлас жемқорлықпен күрес тек құқық қорғау органдарына жүктелмеуі тиіс. Әрбір азамат – өз ауласында, жұмыс орнында, қызмет көрсету орталықтарында заңсыздық көрсе, үнсіз қалмай, ашық пікір білдіруі қажет. Бей-жай қарау – жемқорлықты қолдаумен тең.
Журналистер, қоғам белсенділері, БАҚ өкілдері бұл мәселеге назар аударып, нақты деректерді жария етіп, қоғамда резонанс тудыру арқылы да үлкен өзгерістерге жол аша алады.
Сыбайлас жемқорлықпен күрес – ел болашағы үшін жүргізілетін ұлттық деңгейдегі маңызды науқан. Бұл – күнделікті өміріміздің бір бөлігіне айналуы тиіс мәдениеттілік пен жауапкершіліктің көрінісі. Біз тек заңға бағынған, әділетті қоғамда ғана ұрпағымыздың жарқын болашағына сенімді бола аламыз.
Мөлдір Бекмухамбетова,
Сот әкімшісінің басшысы.
