Табиғаты тамсандырған мекен – Кеген: туризмнің жаңа тынысы

Қазақстанның оңтүстік-шығысындағы көркем табиғатымен көз тартатын аймақтардың бірі – Кеген ауданы. Алматы облысына қарасты бұл аудан соңғы жылдары ішкі және халықаралық туризмнің жаңа бағыттарының біріне айналып келеді. Тау мен жазира, өзен мен көл, тарихи және мәдени мұралар — бәрі де Кеген жерін нағыз туристік мекенге айналдыруда.
Туризм – экономиканың қозғаушы күші
Мемлекет басшысы туризмді экономиканың маңызды саласы ретінде дамыту қажет екенін бірнеше рет атап өтті. Бұл бағытта Алматы облысында, соның ішінде Кеген ауданында да бірқатар істер қолға алынып жатыр. Ауданның географиялық орналасуы, табиғи байлығы мен тарихи орындарының молдығы — туризмді дамытудың берік іргетасы.
Кеген – табиғаттың ғажайып көрінісі. Аудан аумағындағы ең танымал туристік нысандардың бірі — Көлсай көлдері мен Қайыңды көлі. Бұл ғажайып мекендер тек Қазақстанда ғана емес, бүкіл әлемге танымал. Жыл сайын бұл аймақтарға мыңдаған шетелдік және отандық туристер келеді. Қайыңды көлінің су астындағы ағаштары мен Көлсайдың тұнықтығы — табиғаттың ерекше сыйы.Туристер мұнда жаяу серуен (треккинг), атпен серуендеу, балық аулау, жаз мезгілінде шатыр тігіп қону сияқты белсенді демалыс түрлерін тамашалай алады.
Жол мен инфрақұрылым жаңарып келеді. Соңғы жылдары Көлсай бағытындағы жолдар жөндеуден өтіп, туристік инфрақұрылым біртіндеп дамып келеді. Жол бойындағы ауылдарда глэмпинг, этноауылдар, қонақ үйлер мен демалыс базалары ашылып, жергілікті тұрғындар туризм арқылы табыс көзін табуда.
Мемлекет тарапынан да бұл бағытқа қолдау бар: «Ауыл – ел бесігі», «Ауыл туризмі» бағдарламалары арқылы шағын және орта бизнеске субсидиялар мен гранттар бөлініп жатыр.
Туризм – табыс көзі ғана емес,
мәдени көпір
Кеген мен Көлсай арасы – жай ғана табиғат тамашалау емес, бұл – жергілікті мәдениет пен ұлттық салт-дәстүрді таныстыру мүмкіндігі. Туристерге арналып қымызмұрындық, аламан бәйге, қолөнер шеберлерінің көрмесі, күй кештері ұйымдастырылуда. Бұл – елдің рухани әлеуетін көтеретін құндылықтар.
Кеген ауданы – Көлсай көлдері бағытында туристік әлеуеті зор, табиғат көркемдігі жағынан дара өңір. Биік таулар, мөлдір көлдер мен орман аралары демалатын орындар мен шынайы табиғатпен сырласқысы келетін сапаршылар үшін таптырмас мекен.
Төменгі көл жағасындағы шатырлардан демалып, таңды салқын самалмен қарсы алу – қала шуынан шаршаған жандар үшін таптырмас ем. Ағаш көпір арқылы өтудің өзі бір шыңды бағындыратындай сезім береді.
Кеген ауданына жыл сайын отандық және шетелдік туристердің келу саны жылдан жылға өсіп келеді.
Соңғы үш жылда туристік нұсқаушылар мен базалардың саны артты, демалыс орындарының сервис сапасы жақсарды. Аймақ әкімдігі туризмді дамыту мақсатындағы инфрақұрылымды жақсарту, жолдардың жөндеуі, туристік ақпарат орталықтарын ашу бағытында нақты мемлекеттік қолдау бағдарламаларын іске асуда.