Мейірімділік-жүректен

14 қыркүйек «Отбасы күніне» орай, Тасашы ауылындағы мектеп-интернатта дәстүрлі «Мектепке жол -2025» акциясы өтті.
Атырау қаласының тұрғыны, «NJS» компаниясының директоры, кәсіпкер Аяулым Бауыржанқызы туған жерін ұмытпай, интернат жанындағы моншаға арнайы заттарды берсе, кәсіпкер Эльмира Оразымбетова және ұжым қызметкерлерінің қолдауымен өткен акция барысында тәрбиеленушілерге мектепке қажетті сөмке мен оқу құралдары табысталды.
Ата-анасы шалғай жерде жүрген балалардың тәрбиелі болып өсуі ең алдымен отбасы тәрбиесіне байланысты болса, мектеп жасына келгеннен кейін, интернаттағы, яғни екінші ата-анасы тәрбиешілердің берген тәрбиесіне байланысты болады.
Айта кетейік, балаларға арналған мектеп жанындағы интернат 1986 жылы 120 балаға арналып салынса, қазіргі уақытта 66 бала тәрбиеленіп, білім алуда. Бұл жерде әлеуметтік жағынан аз қамтылған, көп балалы отбасының және малшылардың балалары жатып оқиды. Интернат толық мамандармен қамтылған, меңгерушісімен тәрбиешілері және техникалық қызметкерлері бар. Бес уақыт тамақпен жатын орындары тегін, барлық жағдай қарастырылған. Былтырғы жылы интернатқа қаржы бөлініп, материалдық базасы жаңартылса, биылғы жылы интернат ағымдағы жөндеуден өтіп, есіктері ауысып, едендері жаңартылды.
Шараға интернат меңгерушісі Құралай Оқасова, тәрбиеші-ұстаздар және тәрбиеленушілер қатысты.
Іс-шара барысында интернат меңгерушісі Құралай Оқасова құттықтау сөз сөйлеп, жаңа оқу жылының басталуымен тәлімгерлерді құттықтады.
– Отбасы күніне орай ұйымдастырылп отырған бүгінгі республикалық «Мектепке жол» акциясы кәсіпкер ата-ананың және ұжымдағы әріптестерімнің ұйымдастыруымен өткізіліп отыр. Біздің жас достарымыз- еліміздің кемел болашағы. Әсіресе, мектеп табалдырығын алғаш аттаған бүлдіршіндерге зор сәттілік тілеймін! Олар жақсы оқып, ата-аналарын әрдайым қуанта берсін! «Бала – біздің болашағымыз» демекші, кішкентай сәбилердің көңілі тоқ, күніміз шуақты, жүзіміз жайдарлы болсын!- деді ол.
Дәстүрге айналған бұл игі іс жыл сайын тамыз айынан қыркүйек айының соңына дейін жалғасып, көптеген отбасыға қуаныш сыйлайды.
Бұл акция балалардың жаңа оқу жылына қуанышпен қадам басуына ықпал етті. Шара да балалар өз шығармашылық қабілеттерін көрсетті. Ақын жанды балалар өздері шығарған өлеңдерін оқып, шынайы ризашылықтарын білдірді.
«Қайырымдылық жасасаң, қайырын өзің көресің!» деген қазақ атамыз жақсы қасиеттерінің асылы- жомарттық, кеңпейілділік деп білген.
Қайырымдылық акция барысында тек материалдық көмек көрсетіліп қана қоймай, көпшілік жан жылуын сыйлауды да естен шығармады. Қайырымдылық жасау әр азаматтың парызы десек, жас ұрпақты ізгілікке тәрбиелеу әр ата-ана мен ұстаздардың ғана емес, баршаның міндеті. Бұл акция тұрмыстық жағдайы төмен және көп балалы отбасыларға көп септігін тигізеді деген ойдамыз.
Дәурен ЕРМЕКБАЙ.