109 бірыңғай байланыс қызметіне қатысты семинар өтті
Кеген ауданында аудан әкімдігінің үлкен залында 109 бірыңғай байланыс қызметі туралы тұрғындарға түсіндіру және ақпараттандыру мақсатында кеңейтілген семинар өтті. Семинар мемлекеттік қызмет көрсету сапасын арттыру, тұрғындармен тиімді кері байланыс орнату және цифрлық жүйелердің қолжетімділігін түсіндіру мақсатында ұйымдастырылды.
Аталған іс-шараға арнайы Ақпараттық технологиялар орталығы директорының орынбасары Тукенов Рафаэль және Ұлттық ақпараттық технологиялар орталығының Алматы облысы бойынша 109 қызметінің басшысы Нұранов Анаят қатысып, қатысушыларға кең көлемде түсіндірме жұмыстарын жүргізді.
Семинарға аудан әкімдігінің мемлекеттік қызмет көрсету саласының мамандары, 109 байланыс қызметіне жауапты бөлім қызметкерлері сондай-ақ ауылдық округтерден келген мамандар қатысты.
Семинар барысында спикерлер 109 бірыңғай байланыс қызметінің мүмкіндіктері, тұрғындар өтініштерін қабылдау мен өңдеу тәртібі, сондай-ақ ақпараттық жүйелерді тиімді пайдалану жолдары туралы баяндама жасап, нақты мысалдармен түсіндірді.
Семинар тек ақпарат беру шеңберінде ғана емес, практикалық сұрақтарды бірге талқылауға және шешу жолдарын қарастыруға бағытталған. Қатысушылар тарапынан нақты сұрақтар қойылып, сала мамандары тарапынан толық әрі нақты жауаптар берілді.
109 қызметі– халық пен жергілікті атқарушы органдар арасындағы байланыс көпірі. Сондықтан мұндай түсіндіру семинарлары жергілікті өзін-өзі басқару жүйесінің ашықтығы мен тиімділігін арттыруда маңызды рөл атқарады.
Л. Мұхаметқали.
