19 маусым – Медицина қызметкерлері күні
Медицина қызметкерлері марапатталды
Медицина қызметкері – адам жанының жанашыры, денсаулықтың сақшысы, өмір мен үміттің арасындағы алтын көпір. Қандай кезең болмасын, халықтың амандығы мен саулығы жолында аянбай еңбек етіп келе жатқан ақ халатты абзал жандардың еңбегі қашанда құрметке лайық. Осы орайда медицина қызметкерлерінің кәсіби мерекесіне арналған салтанатты шара аудандық мәдениет үйінде жоғары деңгейде ұйымдастырылып өтті. Мерекелік жиынға ауданның денсаулық сақтау саласының ардагерлері мен қызметкерлері, мекеме басшылары және қоғам өкілдері қатысты. Салтанатты шара барысында медицина саласында ұзақ жылдар бойы жемісті еңбек етіп, халық денсаулығын сақтау ісіне сүбелі үлес қосқан мамандарға құрмет көрсетілді. Алғаш болып сөз алған аудан әкімінің орынбасары Кеңес Қабылбеков медицина қызметкерлерін кәсіби мерекелерімен құттықтап, аудан халқының денсаулығын қорғаудағы қажырлы еңбектері үшін алғысын білдірді.
Денсаулық сақтау саласы – қоғамдағы ең жауапты әрі аса маңызды салалардың бірі. Сіздер күн сайын адам өмірі үшін күресіп, тұрғындардың саулығын қамтамасыз етіп келесіздер. Әрбір емделушінің алғысы мен ақ батасы – еңбектеріңіздің лайықты бағасы. Баршаңызға мықты денсаулық, отбасыларыңызға амандық және қызметтеріңізге толағай табыс тілеймін,– деді ол. Мерекелік шара барысында бірқатар медицина қызметкерлері аудан әкімінің Құрмет грамотасымен марапатталды. Сондай-ақ денсаулық сақтау саласындағы жоғары кәсібилігі мен көпжылдық адал еңбегі үшін емхана бөлімінің балалар дәрігері Әсем Әлкенқызы мен емхана бөлімінің жалпы тәжірибелі дәрігері Рита Ұланқызына «Денсаулық сақтау ісінің үздігі» төсбелгісі табысталды. Бұл марапат – олардың халық денсаулығын жақсарту жолындағы табанды еңбегінің айқын көрінісі.
Сонымен қатар Қазақстан Республикасы Денсаулық сақтау министрлігінің Құрмет грамотасымен жұқпалы аурулар бөлімінің аға мейірбикесі Тұрсынгүл Жырғалбайқызы марапатталды. Көп жылдық тәжірибесі мен жауапкершілігі жоғары маманның еңбегі әріптестері арасында әрдайым зор құрметке ие.
Мерекелік жиында сондай-ақ бірқатар медицина қызметкерлеріне «Ақниет» Қазақстан салалық денсаулық сақтау қызметкерлері кәсіподағының Құрмет грамоталары, «Senim» денсаулық сақтау жүйесі жұмыскерлерінің салалық кәсіподағының Алғыс хаттары, аудан әкімінің Құрмет грамоталары мен Алғыс хаттары тапсырылды. Бұл марапаттар сала мамандарының күнделікті қажырлы еңбегіне берілген әділ баға болды. Жиын барысында сөз сөйлеген Кеген аудандық ауруханасының директоры Қуаныш Бөлегенұлы әріптестерін кәсіби мерекемен құттықтап, аудан тұрғындарының денсаулығын сақтау жолындағы еңбектің маңыздылығына тоқталды.
– Медицина саласы – үлкен жауапкершілікті талап ететін мамандық. Біз үшін әрбір адамның денсаулығы мен өмірі қымбат. Сондықтан алдағы уақытта да халық игілігі жолында аянбай еңбек етіп, сапалы медициналық қызмет көрсету бағытындағы жұмыстарымызды жалғастыра береміз, – деді ол.
Салтанатты жиын аудандық мәдениет үйі өнерпаздарының арнайы әзірлеген концерттік бағдарламасына ұласты. Әсем ән мен күмбірлеген күй, жүрекке жылы әсер сыйлаған көркем қойылымдар мереке сәнін келтіріп, ақ халатты абзал жандарға ерекше көңіл-күй сыйлады.
Адам өмірінің сақшысы атанған медицина қызметкерлерінің еңбегі қандай құрметке де лайық. Себебі олардың күнделікті қызметі– мыңдаған адамның саулығы мен өміріне деген жауапкершілік. Сондықтан қоғамның ең асыл құндылығы – адам денсаулығын қорғап жүрген дәрігерлер мен мейірбикелердің мәртебесі әрдайым биік болмақ.
Л. МҰХАМЕТҚАЛИ.
