Сала қызметкерлеріне құрмет көрсетілді
Лаура МҰХАМЕТҚАЛИ, Суреттерді түсірген: Мира МУРАТАЛИЕВА, «Қарқара» газеті.
Сала қызметкерлеріне құрмет көрсетілді
10 шілде – Ветеринария қызметкерлері күніне орай аудан әкімдігінің үлкен залында аудандық ветеринария қызметкерлерін аудан әкімі қабылдады.
Ауыл шаруашылық аудан саналатын өлкенің экономикасының негізгі тірегінің бірі – малшаруашылығы болмақ. Тұрғылықты халық ауыл шаруашылығымен қатар малшаруашылығы арқылы тіршілігін қомдап келеді. Себебі, шұрайлы табиғатымен, кең байтақ көк шалғын жерімен танылған ауданның тіршілік көзі мал өсірумен тікелей байланысты. Осы тұрғыда ел экономикасының қарыштап дамуына, тұрғындардың сапалы өмір сүруіне тікелей еңбек етіп отырған ветеринария саласының қызметкерлерінің еңбегі орасан зор. Халық арасына тұтынатын мал өнімінің сапалы болып, еш алаңсыз тұтынуына осы сала еңбеккерлері өз үлесін қосуда.
Мерекеге орай Алматы облысы ветеринария басқармасы басшысының орынбасары Қиялбеков Нұртас Тынышбайұлы және Алматы облысының ветеринариялық станциясының директоры Мұхтар Сабырбек Хамитұлы арнайы келіп сала мамандарын мерекемен құттықтап, Кеген аудандық ветеринария бөлімінің ветеринариялық дәрігері Мамырқұлов Жамбылға «Еңбек ардагері» төсбелгісін, Тасашы ауылдық округінің ветпунктінің ветеринариялық санитары Иманбеков Сайлаубекке, Жылысай ауылдық округінің ветеринариялық фельдщері Балғабаев Сәбит, Қарабұлақ ауылдық округінің ветеринариялық санитары Шыңғысбаева Заураның кеудесіне «Еңбек үздігі» төсбелгісін тақты. Сондай-ақ, ветеринария саласының бір топ қызметкерлері мереке қарсаңында мадақталып, Алматы облысы әкімінің Құрмет грамотасымен, аудан әкімі Нұрбақыт Молдахметұлының Алғыс хатымен марапаттап аудан әкімі сала қызметкерлеріне құрмет көрсетті. Аудан әкімі Нұрбақыт Молдахметұлы сонымен қоса Қарабұлақ ауылдық округінің ветпунктіне облыс әкімі М.Елеусізұлының қолдауымен, облыстық ветеринария станциясы тарапынан берілген НИВА автокөлігінің кілтін табыс етті.
Ауданда ветеринар мамандары заман талабына сай жұқпалы аурулардың алдын алуға жүйелі еңбек етіп келеді. Мемлекет тарапынан көрсетіліп жатқан қолдау да – бұл салаға деген сенім мен жауапкершіліктің айқын көрінісі болмақ. 6 ауылдық округтерге Жалаулы, Талды, Шыбышы, Ақтасты, Ақай Нүсіпбеков, Саты ауылдарына заманауи үлгіде мал қорымдарын салу жоспарлануда. 7 ауылдық округтерге Кеген, Жалағаш, кіші Қарқара, Жайдақбұлақ заң талабына сәйкес мал қорымдары салынып, қолданысқа берілді. Үстіміздегі жылы Жалағаш ауылдық округіне модульді ветпункт салуға жер телімі бөлініп, құжаттар рәсімделуде. 11 ауылдық округтерге Тоғызбұлақ, Ұзынбұлақ, Қарабұлақ, Жайдақбұлақ, Тасашы, Қарқара, Шырғанақ, Бөлексаз, Жылысай, Кеген, Ақсай мал дәрілеу қашалары салынып қолданысқа берілді.
