Салт-дәстүрді ұлықтаған аналар
Салт-дәстүрді ұлықтаған аналар
Қарқара жайлауында биылғы жылғы, Кеген аудандық «Қымызмұрындық- 2025» мәдени шарасы және «Жолан жүйрігі» ат бәйгесі-ұлттық құндылықтар мен спортты дәріптеген шара еліміздің рухани бай мұрасын жалғастырудың негізі болды. Осы дүбірлі үлкен шарада аудандық аналар кеңесінің республикалық форумы өтті. 2014 жылдан бері жұмысын бастаған аналар кеңесі аудандық “Отбасы мектебі” жобасы аясында “Қыздар кеңесі”, «Жас отбасымен жұмыс», «Ұлы дала аналарын дәріптеу» мақсатында «Білім бөлімімен» меморандум арқылы полиция, денсаулық сақтау бөлімдері, жастар орталығымен қызметтік байланыста аудандағы 12 округта құрыла отырып, өз міндеттерін атқарып келеді.
2022-2024 жылдары республикалық “Мәдениетті ана-мәдениетті ұлт” жобасының «Еліне азамат тәрбиелеген отбасы», «Бақытты ана-бақытты отбасы», «Тұғырлы отбасы-бақытты балалық шақтың бастауы», «Жақсылыққа жетелейтін жандар» 4 бағытымен, осы жоба аясында 2024 жылдан «Салауатты сана» жобасының «Ысырапшылдық», «Лудомания», «Зорлық-зомбылыққа қарсы күрес», «Вандализм», «Нашақорлықпен күрес» бағыттарымен жүргізіліп жатқан жұмыстары көрсетілді. Аудандық әкімшіліктің демеушілігімен, аудандық аналар кеңесінің атқарылған жұмыстары, арнайы дайындалған шатырларда көрнекіліктер мен іс-құжаттары арқылы қорғалды.
Сонымен бірге, “Ата-баба дәстүрі – ұрпаққа аманат!” тақырыбымен тігілген 6 жарты қазақ үйде Сәби кезеңінен Дана әжеге дейінгі ананың өсу кезеңдерін бейнелейтін көріністер көрсетілді. Барлық қазақ үйлер ұлттық салт-дәстүр айшықталған, ою-өрнектермен өрнектелген жиһаздармен безендірілді. Шырғанақ, Бөлексаз округі аналар кеңесі төрайымдары Р.Батырханова мен Г.Әкімжанова ұйымдастырған аналар сәби кезеңінен «Бесікке салу», «Тұсау кесу» рәсімдерін өткізді. Ұзынбұлақ, Жылысай округі аналар кеңесінің төрайымдары А.Түзелбекова мен Б.Тойжанова ұйымдасырған аналар кеңесі Ғұмыры ұзақ болсын деген ниетпен Бойжеткеннің ұзын шашына «Шашбау» тағып, тіл-көзден аман сақтасын деп» «Шекелік» тағып тұрмысқа шығар алдындағы «Сырға салу» дәстүрін көрсетті. «Жалағаш, Алғабас округі аналар кеңесі төрайымдары Н.Қызайбекова, Б.Мыркасымова ұйымдастырған «Жас отауға» қадам басу, ұзату көрінісін және «Қыз жасауы» көрмесін көрсетті, Қарабұлақ, Саты округі аналар кеңесі төрайымдары К.Шүңгілова мен Ж.Манасурова ұйымдастырған аналар «Жас келін» жасайтын ырым «Босаға майлау» жасалып, «Ақ орамал» салу дәстүрін көрсетті, қыз жасауынан көрме қойды. «Әйел-ана» кезеңін Тұйық пен Кеген округі аналар кеңесі төрайымдары Ғ.Сатаева мен Н.Сасықова ұйымдастырған аналар ананың ұрпағына берер тәрбиесі мен үлгі-өнегелерін паш етті. Ал «Дана әжені» бейнелеген Қарқара,Тасашы округі аналар кеңесі төрайымдары К.Әлдібаева мен С.Қасымханова ұйымдастырған аналар ұрпағының көрсетер сый-құрметін, әженің ұрпағына арнаған аманатын табыс етуді көрсетті. Осы жерде 1929 жылдан бергі жылдарда ұрпақтары сандықта сақтаған 19 кимешекті киген әжелердің «Кимешектер сыр шертеді» атты «Ақ кимешек» әнімен кимешектер шеруі жүріп өтті. Форумда ҚХА республикалық Аналар кеңесінің төрағасы Ы.Н.Шанаи осы кимешектердің тарихын айшықтайтын музей ұйымдастырылса деген ұсыныс айтты.
Атаулы шараға республикалық Аналар кеңесінің төрайымы Шанаи Назипа Ыдырысқызы бастаған, республикалық Аналар кеңесінің төрағасының орынбасарлары Әлпейісова Камал Әбілқасымқызы, Ахатай Баян Орынбасарқызы, республикалық Аналар кеңесі төрағасының Астана қаласы бойынша орынбасары Ахтаева Ботагоз Сейтхановна, республикалық Аналар кеңесінің мүшесі Турмаганбетова Айша Курмангалиевна, Астана қаласы Аналар кеңесінің төрағасы Тәңірбергенова Алтынай Мұратжанқызы, облыстық аналар кеңесі төрағасы Жошыбаева Гүлнара Сағатқызы, ауданаралық аналар кеңесі төрайымдары, облыстық «Қоғамдық келісім және даму орталығының» басшылары мен мамандары қатысты.
Аудандық аналар кеңесінің жұмысы республика көлемінде таратылды. Он жылдан астам кезеңде қоғамдық негізде аналар кеңесінің жұмысын абыроймен атқарып, ұрпақ тәрбиесінде өз үлестерін қосып жүрген ардақты аналарымызға бақытты ғұмыр, денсаулық, отбасылық жақсылықтар тілейміз.
Бақытгүл Демежанқызы,
Аудандық аналар кеңесінің төрайымы.
