Өмірі өнегеге толы Батыр ана 15 баланың анасы, 49 немере, 48 шөбере сүйіп отыр
Жуырда Жалағаш ауылдық мәдениет үйінде «Мәдениетті – ана, мәдениетті – ұлт» жобасының аясында «Бақытты ана – бақытты отбасы» бағыты бойынша «Ұрпағымен өнеге болған Ана» атты тәрбиелік мәні мен маңызы бар кеш өтті. Бұл кештің басты кейіпкері Жайдақбұлақ ауылының ақ жаулықты анасы Биғайша Әліқұлова апаның өмір белесі, өнегесі мен ұрпаққа берер тәлімін негізге ала отырып, кейінгі жастарға кешегі өткен аналарымыздың сара жолын, көрген білгені мен көкейге түйгенін паш ету. Паш ете отырып, көңілге түю, тәлім алу, отбасылық өмірде береке мен ырыстың, тыныштық пен татулықтың ұйытқысы әйел адамның қолында, ұрпағының өнегесі ананың аялы алақанында екенін сездіру.
Отбасылық берекенің ұйытқысы болған ақ жаулықты ананың өмір көшін кейінгі ұрпаққа таныстыруды мақсат тұтқан шырайлы кешке аудандық Ішкі саясат басқармасының басшысы Қалқаев Еркінбек, аудандық аналар кеңесінің төрайымы Көнеева Бақытгүл, ауылдық округтің ақсақалдар алқасы, аналар кеңесінің төрайымдары, ауыл халқы қытысты. «Ана өмір гүлі»,- демекші кешегі өткен қилы замандарда елдігіміздің туын жықпай, бірлігімізді бекем етіп, бір қолымен әлемді тербетсе, бір қолымен бесік тербеткен батыр аналарымыздың көшін жалғап, ұрпақ сабақтастығын жалғап келе жатқан аналарымызбен бүгінгі кештің кейіпкері жайлы Жалағаш ауылдық аналар кеңесінің төрайымы Қызайбекова Нұргүл баяндама жасады. Ерін ерлікке балап, баласын батырына теңеген ақ жүректі әрбір аналарымыздың өмір көші бітпес дастан болар. Елдің ұйытқысын ұйытып, келешегіне мызғымас жол салып, ұрпағына бойындағы ақ адал пейілін дарытып отырған аналарымыздың дұғасы бүгінгі бейбіт күннің сәулесі іспетті. Әрине, ананың тілеген тілегі қайтарылмайды дейді ғой, әр кеудеден орныққан ана жүрегінің ақ – адал ниеті жақсылыққа бастап, бейбіт таңы арайлап атқаны шүбәсіз. «Ана»,- десе елеңдемес жан, қалам тербемеген ақын болмаған шығар. Осы кештің де өрнек тауып, жанға жылу сыйлап отырғаны да ананың ыстық ықыласының көрінісі.
Биғайша апамыздың өнегелі өмір жолы бүгінгі жас келіндерге үлгі болсын деген ниетті жалау еткен әсерлі кеш кейіпкермен сұхбат жүргізе отырып, көкейде қалған естеліктері мен отбасының берекесін ұйытудағы өз алдына қойған мақсат, атқарған әрекеті жөнінде пікір алмасты.
Өз өмірін жіпке тізгендей ризашылығымен баян ете отырып, жас буынға ақылын, даналық сөздерін, ізгі ниеті мен ілтипатын білдірді.
Ұрпаққа өнеге бола білген ақ жаулықты Биғайша апамыз «Ұлықты ұл мен қылықты қыз» тәрбиелеп, ұрпағы бүгінде ел ертеңіне қызмет етіп, әр салады еңбек етуде. Биғайша апамыз жолдасы Жүніспай атымзбен тату-тәтті отбасылық өмірдің діңгегін қалап, 15 баланы дүниеге алып келген. Бүгінгі таңда 49 немере, 48 шөбере сүйіп отырған бақытты әже. Батыр ана десекте болар. Батырлығымен отбасының ұйытқысын, лайым ынтымағын ұйытып, көпке үлгі болып отыр. Көненің ізін жалғап, ұрпағының қызығына кенеліп, жақсылықты жанына медет тұтқан ақ жаулықты апамыздың өмір өткелі, ұрпағының өнегесі айшықталған бейнетаспа экраннан көрсетіліп, жанға жылулық сыйлады.
«Отбасы- шағын мемлекет»,- қағидасын негізге алар болсақ, осындай өмір көшін өнегеге толтырып, ұрпағының ортасында жақсылыққа жаны нұрланып отырған ақ аналарымыз бен аталарымыздың белеске толы көшін жалғар ұрпақ болайық!
«Ел болам десең, бесігіңді түзе»,- деп Мұхтар Әуезов айтпақшы ата-ана үшін ең үлкен жетістік ұрпағының салиқалы, саналы болып ержетуінде. Ұрпағы жақсы ата- ана ел ішінде масайрай өскен алып бәйтеректей болмақ. Тамырын тереңге жайған бәйтеректің бір парасындай ұрпағымен өнегесін асқақтатып отырған Биғайша апамыздың батырлығын ел біледі. Батырлық ана жүрегіне ойысып, ұрпағымен өркен жайып келеді. Ұрпағыңыз ертеңіңізге мол азық болып, кемелді келешектің үрім бұтағындай жайқалып өсе берсін дедік. Ақ жаулығын желбей жамылған апамыздың әппақ жаулығындай ақ пейіліне тәнті болып, ұрпағыңызбен мың жасаңыз демекпіз.
Лаура Мұхаметқали,
«Қарқара» газеті.
