Жалағаштағы жаңашылдық
![](https://qarqaragazeti.kz/wp-content/uploads/2024/07/Фото-4-905x613.jpg)
Халқымызда «Бір жылдығын ойлаған халық бидай егеді, он жылдығын ойлаған халық ағаш егеді, жүз жылдығын ойлаған даналар дәнегін себеді» деген аталы сөз бар. Расында туған жерді көркейту-көгалдандыру баршамызға ортақ іс, әрі келешек
ұрпақтың жарқын болашағы үшін жасалған үлкен қадам. Жалағаш ауылында «Ауылым алтын бесігім-туған жер өмірдің қайнар бұлағы» қорының ұйымдастыруымен жұртшылықтың өз күшімен салған саябақтың салтанатты ашылуы болды.
Жалпы саябақтың көгалдандырылған аумағының көлемі бір шақырым, шырша, ақ қайың, терек, сирень ағашы егілген. Жарықшаммен бейнебақылау камералары орнатылған. Әсем әрі көрікті саябақ көпшілікке ұнады. Ауыл ажарын ашып, көгалдандыруға оң серпін беретін саябақтың ашылу салтанатына ақсақалдар, әкімдік өкілдері, ауыл әкімдері, тұрғындар мен арнайы қонақтар қатысты. Жалағаш елді-мекенінде пайдалануға берілген көгалдандыру орны жергілікті халықтың өз-өзіне жасаған сыйлығы десек болады. Осы ауылдан түлеп ұшқан жерлестер, қазір тіршілік кешіп жатқан
жұртшылық барлығы тұрғызған саябақтың құрылысы сәуір айында басталған.
Атам қазақ қандай іс болсын батасыз бастамаған, Жалағаш ауылдық ақсақалдар алқасының төрағасы Әріп Сыбанбаевтың ақ
батасынан соң, саябақтың ашылу лентасын аудан әкімінің орынбасары Медет Исаев, Әріп ақсақал, Тайбек Смайловтар қиды. Ақ жаулықты аналар шашу шашып, құтты болсын
десті.
-Бұған дейін ауылдастар болып, Нұраш бастаған идеяны қолдап, қуаттаған едік. Ауылдастарымның ауыз біршілігіне,
осындай ықыласына алғысымды білдіремін, – дейді игі істің басы-қасынан табылған ұйымдастырушылардың бірі Тайбек Смайлов.
Медет Исаев, аудан әкімінің орынбасары: – Осы ауылдың ел ағалары ауданымызға үлгі болып, Жалағаш ауылының кіреберіс жеріне керемет саябақ жасап жатырсыздар. Аудан әкімінің атынан алғасымды білдіремін. Игі істің басында жүрген ел ағаларына, жастарға үлкен алғыс айтамыз. Кеген ауданында 34 елді-мекен болса, әдемі саябақ жасаған Жалағаш ауылы үлгі боларлық ауылдың қатарында. Істеріңіз берекелі болсын!- дей келе, көгалдандыруға ат салысқан азаматтарды
аудан әкімінің Алғыс хаттарымен марапаттады. Алматы облысы бойынша «Варшава келісімі» ардагерлер қоғамының төрағасы Бекзат Махатов, аудандық маслихат депутаты Нұргүл
Қызайбекова, Жалағаш ауылдық округінің әкімі Айгүл Садырова, ауыл азаматтары Мейірбек Тұрлығожаев, Меркібай
Молдамұратов, Жанат Сағынбаев, Дархан Боранбаев, Шопан Алиев, Айқын Қарағұлов т.б. сөз сөйлеп, ақжарма тілегі мен тындырымды тірліктері үшін алғыстарын білдірді. Шара барысында туған жер үшін айрықша еңбек сіңірген ата-әжелердің иықтарына шапан жабылып, құрмет көрсетілді. Сондай-ақ, ауылды көркейту һәм көгалдандыруға қосқан үлесі үшін бірқатар азаматтарға алғыс айтып, «Ауылым алтын бесігім-туған жер өмірдің қайнар бұлағы» қорының Алғыс хаттары табыс етілді.
Ал, жергілікті әншілер Сәния Қонақбаева, Бақытжан Құсайынов, Аманболмен Есенбол Тоқайұлдары сынды кішкентай өнерпаздар ән-жырдан шашу шашты.
– Осындай саябақтың ашылғанына қуаныштымын.
Неге десеңіз, бұған дейін бізде мұндай саябақ болмаған. Болашақта жолдың екі жиегіне үш шақырым жерге өзіміздің тауда өскен көк шырша қарағайды егу жұмыстары кезең-кезеңімен жалғасын табады. Ауылымыз дами берсін!-деп тілегін жеткізді зейнеткер Көпжасар Нұрлыбаев. Ұйымдастырушылардың айтуынша, олар бүгінгі іспен тоқтап қалмақ ойлары жоқ. Алдағы уақытта да саябақ ауқымы кеңейіп, көгалдануына деген ойларын жүзеге асыруға білек сыбана кірісетін болады. Олардың жоспарында үш шақырым жерді
көгалдандыру мақсаты тұр. Осылайша, жаңашылдыққа бет бұрған Жалағаштықтардың мақсаты айқын, арманы асқақ!
Дәурен ЕРМЕКБАЙ.