«Нурикамал» драмалық қойылымы сахналанып, аудан халқына рухани азық сыйлады

12

Аудандық мәдениет үйінде  «Назар» театр әртістерінің көркемдеуімен елімізге танымал сазгер, халықаралық, республикалық байқаудың лауреаты Тұрдықылыш Ізтаевтың ең танымал «Нурикамал» атты махаббат пен лирикаға толы әнінің шығу тарихы жөнінде С.Әбдіхалықовтың  болған оқиға ізімен драмасы сахналанды. Арнайы ауданымызға рухани азық ала келген «Назар» театрының әртістері көрерменнің көңілінен шығып, кеш соңында аудандық ақсақалдар алқасының төрағасы Сабыр Досымбековтан бата алды. Ақсақалдың айтуы бойынша бұл қойылым Сабыр атаның заманының бейнесі, сол кезеңдегі жастық дәуренін еске сала отырып, көңілін толқытқанын жеткізді.

80-90 жылдарда болған оқиға.  Сазгер Тұрдықылыш жолдастарымен тау сағасында демалыс барысын, жақсы отырыс пен көңілді кештің әсем көрінісінде, қонақ болып келген лауазымды қызметтегі сұлу бойжеткен Нурикамал атты қызға кеш барысында ессіз ғашық болып қалғандығы көрініс табады. Кеш барысында ғашық сері бойжеткенді биге шақырғандығы,  дастархан басында қызға қайта-қайта қарап, жүректе сезім оянғаны негізделген. Әйелі мен үш қызы бар Тұрдықылыштың бұл әрекетін сезіп, біліп отырған әйелі бойындағы тынымсыз әрекетті жайып салып, қызғаныш сезімін білдіріп, әуре-сарсаңға түседі. Осы мезетте сазгер ән көгінде қалықтап, саз әлеміне еріп, әуезді бір әннің ырғағында махаббатқа, сағынышқа толы әуенді пианинода ойнап, жүректегі туындыны әуенге салып, тебіренеді. Осы тұста ашу мен қызғаныш бойын билеген әйелі Ханбибі жолдасының сағынышқа толы сазына еріксіз шабыттың желісінде шумақтар құрастырып, толассыз шабыттың күшімен өлең өріп, «саған керегі осы ма еді…»,-деп,  сазгердің алдына тастайды. Шумақтарды қуалай оқыған сазгер, саз бен сөз үйлесім тапқанын, сөз құдіретінің әуенге құлаш ұрғанына көзі жетіп, шарқ ұрады… Ақын шығармашыл жан Тұрдықылыштың әйелі Ханбибі жолдасының сезімін түсініп, жүректен шыққан туындының өмірі ұзақ боларын бағамдап, екі жасты қоспаққа әрекеттенеді. Жолдасының сазымен үйлесімін тапқан сезіміне сөз арнап, махаббаттың құдіретіне бойұсынған Ханбибі, Нурикамалға келіп, Тұрдықылышқа шекесі торсықтай ұл тауып берерсің,- деп ризашылығын білдіреді. Сөйтіп, ауыр болса да сазгердің сезімін құрметтеп, қос ғашықты бақытқа жетелейді.

Әйелдің нәзік жаны мен шығармашыл жанның нәзік сезімін арқау етіп, ерінің бақытын басты орынға қойған кемеңгер әйелдің бейнесін сомдаған қойылым мен  әннің шығу тарихының  желісі көреременнің көзайымы болды.

Махаббаттың құдіреттілігі жырға, сазға арқау болып, жүректің тыныштығы орын алып, бүгінде ел аузында тарап, сахна төрінде қалықтап, «Нурикамал» әні тыңдарманның сүйіп тыңдар сазына айналған. Бірі білсе, бірі біле бермейтін туындының өмірге келуі, бүгінгі күнге дейін өз тұғырынан аласамауы, махаббаттың шынайы бейнесін әрлегенінде, көркемдеп жүректен шығып, жүрекке жеткенінде деп білеміз.

Кеш соңында аудан әкімі Н.Теңізбаев «Нысана» театрының әртістеріне алғыс білдіріп, шығармашылық биік белестер тілеп, аудан әкімдігінің «Алғыс хаты» мен сый-сияпат табыс етті.

Көрерменнің көзайымы болып, жүректерді толқытып, шабыт пен шаттық сыйлаған әптістерге біз де, толайым жақсылық, биік мәртебе тіледік.

 

Лаура Мұхаметқали,

«Qaraqar».