Ұрпақ жалғастырушы асыл жандар

Тіршілік бастау алатын көктем айының алғашқы мерекесінің бірі – аяулы аналар мерекесі екені бекер емес. Отбасының берекесі, ең сұлу, ең кереметі – АНА деген есім. Ана – дүниедегі алақаны аялы, балаға деген ерекше махаббаты бар мейірім иесі. Бала бойындағы асыл қасиеттер де алдымен анадан тарайды.

«Отан отбасынан басталады» деген ұғым қашан да мәңгі ұғым. Ал отбасылық құндылықтың мәуелі бәйтерегі ол ана. Отбасында ұрпағына дұрыс жолды меңзеп, жақсыдан үйреніп, жаманнан жиренуге, рухани бай болуына да әкесімен бірге септігін тигізетін де анасы.

Дала елінің өшпес мұрасын сақтап, елдікке сын болар қиын кезеңдерде ерлерімен бірге қоғамның ауыр жүгін арқалап, Алла берген Аманат адамзаттың артындағы ізін-келешек ұрпақты жалғастырушы асыл жандар.

Ананың мейірі, жан-жағына шашқан шуағымен нұрланған адамзат ананы ардақтап, аялай білсе, бұдан асқан бақыт бар ма! Еліне еңбек сіңіріп, пайда келтіретін, ұлттың қазынасы болар 12 ауылдық округте аналар кеңесінің төрайымдары бар. Олардың жетекшілігімен республикалық «Мәдениетті ана – мәдениетті ұлт» жоюасының 4 бағыты, аудандық аналар кеңесінің 6 бағыты ұрпақ тәрбиесі, отбасының беріктігі, ана мен бала денсаулығы мәселесіне байланысты шаралар жүргізіледі. Аудандық білім бөлімі, жастар ресурстық орталығы, денсаулық сақтау мекемесімен бірге «Қыздар кеңесінің, Ана мен әке мектебінің» жұмысын бірлесіп, сұхбат, кездесу, семинар, спорттық дода, байқаулар сияқты тәрбиелік мәні зор, мазмұнды шаралар өткізіп келеді. Бірнеше төрайымдар көше бойынша да жұмыстар атқаруда.

Аудандағы халықтың 52% аналар. Олардың 204 дәрігер, 1020 ұстаз, 333 кәсіпкер, 30 мемлекеттік қызметкер ауданның экономикалық- әлеуметтік дамуына үлес қосса, 2803 зейнеткер еңбектерінің зейнетін көруде, 404 Алтын алқалы, 424 Күміс алқалы алтын құрсақты аналар мен мақтанамыз.

Құрметті шексіз мейірімі мол, әділ жол сілтеуші, елдің рухани, әлеуметтік, экономикалық дамуына өз үлестерін қосып келе жатқан асқақ құдірет иесі – аяулы Аналар, мерекелеріңіз құтты болсын. Тұғыры биік елдің, отбасы да берік, қазығы нық, шаңырағы биік, тәрбиеленер ұрпағы өнегелі болудағы еңбектеріңіз еселенсін. Абыройлы атақтарыңыз биіктей берсін.

Б.Д Көнеева,

Кеген аудандық Аналар кеңесінің төрайымы.