Бәрекелді!

Тәуелсіздік күні мерекесі қарсаңында Кеген ауданындағы Саты ауылында қуанышты жағдай болды. Атап айтқанда, осы ауылдағы А. Түркебаев атындағы орта мектептің жанынан салынған спорт залының, мәжіліс залы, асханасының салтанатты ашылу рәсімі болды. Сөз орайында айта кеткен жөн, аталған орта мектеп 1919 жылы күрделі жөндеуден өткізілген болатын. Осы кезде облыс әкімі А. Баталовтың қолдауымен көрікті Көлсайға баратын үлкен жолдың бойындағы мектеп биыл қосымша құрылыспен толықты. Заманға лайық спорт залы, мәжіліс залы, асханасы жасалып, пайдалануға берілді. Оған бюджеттен 358 миллион теңге қаражат бөлінді. Құрылыс жұмыстарын Сайдулла Сәрсенов бастаған «Риголит» ЖШС-і мерзімініде сапалы аяқтап шықты. Облыстық жастар ресурстық орталығы 20 миллион теңге қаражат бөліп, спорт залды заманауи спорт құрал-жабдықтарымен қамтамасыз етті. Сөйтіп, бірнеше бөлмеге орналастырылған құралдар ауыл жастарының, мектептегі спорт сүйер жасөспірімдердің бір уақыт демалып, жаттығатын, дене шынықтыратын сүйікті орнына айналды. Ал, «Риголит» ЖШС-і мектептегі ұлдар мен қыздарға арналған технология кабинетін жабдықтап беріп, азаматтық танытты.

Спорт залдың салтанатты ашылысында аудан әкімі Талғат Байедилов, ауылдың бір түлегі, ҚР ҰҚК облыстық басқармасының басшысы Сәбит Құрманәлиев, «Риголит» ЖШС-нің директоры Сайдулла Сәрсенов, ардагер ұстаз Жібек Мырқасымова сөз сөйлеп, жаңғырып, жайнаған, қосымша құрылыспен толығып, көркін ашып, бар жақсылығын алға тартқан мектепің ұстаздар ұжымына еңбекте жеміс, жанұяда бақыт тіледі. Заманға лайық бар дүниесі жасалған мектептен болашақта Тәуелсіз Отанымыздың мерей мен мәртебесін көтеретін азаматтар шықсын деген жақсы сөздерін алға тартты. Аудан әкімі Т. Байедилов салтанатты сәтте мектептің күрделі жөндеу жұмысын, қосымша құрылысын сапалы аяқтап шыққан «Риголит” ЖШС-нің директоры С. Сәрсеновке ауыл, аудан тұрғындары атынан астына ақ боз ат мінгізіп, иығына зерлі шапан жапты. Салтанатты рәсім аудан өнерпаздарының концерттік бағдарламасына, волейболдан аймақтық жарысқа ұласты.