Он бес тұрғын үйдің кілті тапсырылды

231

Биылғы жаз салқын жаз болып тұр. Әр күн сайын табиғат мың құбылады. Ара-тұра жел шығып та кетеді. Селдетіп-көлдетіп жаумаса да, жауын-шашынсыз емеспіз. Тіпті кейде табиғатана барша жұртшылықтың басына түсіп тұрған қиындықтарды сезініп, соған үнін қоса тілдесіп, соған бола мінез танытып жатқандай да болып көрінеді.
Ең бастысы, Елордамыз Нұр-Сұлтан қаласының күні мерекесі есте қаларлықтай болды. Аудан орталығы Кеген ауылының күн шығыс жағындағы кіреберісінің іргесін кеңітіп, жүзін ашып, болмысын шырайландыра түскен, жаңадан бой көтерген 15 тұрғын үй көптен бері ел назарын өзіне аударып келе жатқан еді. Бұл мемлекетіміздің
«Нұрлы жер» бағдарламасы аясында салынған тұрғын үйлер болатын. Аталған жалгерлік тұрғын үйлерді салу үшін жергілікті бюджеттен 251 миллион теңге, инженерлік-коммуникациялық жұмыстары үшін 147 миллион теңге қаражат
бөлінді. Құрылыс жұмыстарын Серік Жазықбаев басқаратын «СЕМ ШОҒЫ» құрылыс сервис ЖШС-нің құрылысшылары жүргізді. Керегесі қызыл кірпіштен қаланып, сырты қапталып, сыланған, заманға сай жылы да, жайлы, сәнді де сәулетті үйлер шын мәнінде адам қызығарлық. Айналасы әдемі қоршалған, есіктерінің алдына оюлы тастар төселген, ішінде адамға бар қажетті жағдайы бар үйлер иелеріне қуаныш пен
игілік сыйлары анық. Бүгінгі мереке күні қоныс қуанышына ие болатын жандар белгілі. Негізінен аудандағы көп балалы отбасыларына, әлеуметтік жағынан аз қамтылған жандарға, бірнеше үй-жайлары жоқ жетім балаларға, Кеген ауылында тұратын Ұлы Отан соғысына теңестірілген ардагер асыл анамыз Рысалды Малдыбековаға берілетін болды. Біз тұрғын үйді беретін кезде арамызда тұратын осындай отбасыларының жайын ойладық. Қиындықтарын сейілтіп, қуаныштарын тасыта түсуді жөн санадық. Осынау игілік мұнымен бітпейді. Алдағы уақытта аудан орталығынан тағы да 36 тұрғын үй салынатын болады. Менің құрылыс жұмыстарын жүргізіп, тұрғын үйлерді сапалы аяқтап шыққан Серік Жазықбаев басқаратын «СЕМ ШОҒЫ» құрылыс сервис» ЖШСнің құрылысшыларына аудан тұрғындарының атынан алғысымды білдіремін.
Өмірде баспаналы болудың қуанышы шексіз де шетсіз. Баспана – тірліктің
шаттығын, еңбектің қуанышын, өмірдің бақытын сыйлайды. Ендеше, бүгін баспаналы, жылы да жайлы үйлі болып отырған жерлестеріміздің қуаныштары ұзағынан
сүйіндірсін! Мерекеде баршаларыңызға бақыт, мықты денсаулық, еңбектің жемісін тілеймін! Қазіргідей күрделі қиындығына толы кезеңде басымыз аман, бауырымыз бүтін, жұртымыз тыныш болсын!,-деді осынау қуанышқа арнайы ортақтасып, тұрғын үйлердің кілтін салтанатты жағдайда тапсырған аудан әкімі Талғат Байедилов.
Осы күні «СЕМ ШОҒЫ» құрылыс-сервис ЖШС-нің директоры Серік Жазықбаев
тұрғын үйлі болған жандарға жылы лебізін жеткізіп, оның естелік кілтін аудан әкіміне
құрметпен тапсырды. Тұрғын үйлі болған Тимур Айтжанов осынау мемлекеттік бағдарламаға негіз қалаған Тұңғыш Президентіміз-Елбасы Н. Назарбаевтың
атына, мемлекет басшысына, облыс, аудан әкімдеріне тұрғын үйлі болған отбасыларының атынан жүрекжарды алғысын жеткізді. Рас, осы күні баспаналы болып, қоныс қуанышына ие болғандардың ішінде Айгүл Мыңбаева, Жомарт Ибрайымов секілді көп балалы отбасының иелері, мүмкіндігі шектеулі жан Тимур Айтжанов, Қуаныш Сұлтанғазиева, Айнаш Қарғалтаева, Индира Тюлемишова, Назира Шоранова, Дариға Тұманшиева, Азат Есімбай секілді әлеуметтік жағынан қолдауға тұрарлық отбасыларының иелері бар. Осы күні аудандық ҰҚК, аудандық полиция бөлімі,
аудандық прокуратура мен аудандық төтенше жағдай бөлімінің бір-бір қызметкері үйлі болды.
Жаңадан салынып, пайдалануға берілген жалгерлік тұрғын үйлердің салтанатты лентасын аудан әкімі Талғат Байедилов, аудандық мәслихаттың хатшысы Нұрбай Советов, аудандық аналар кеңесінің төрайымы, ҚР Білім беру ісінің үздігі, Ы.Алтынсарин атындағы төсбелгінің иесі Бақытгүл Көнеева, «СЕМ ШОҒЫ» құрылыс сервис ЖШС-нің директоры Серік Жазықбаев қиды.
Осы күні ел көзіне ерекше түскен жасы тоқсанға таяған ардагер ана, асыл әже Рысалды Малдыбекова болды. Ұлы Отан соғысы ардагерлеріне теңестірілген ақылман ананың жаңа үйінде болдық. Ақ дастарханынан дәм татып, ақ батасын естідік.
-Қарақтарым, бастарыңа қандай күн туып жатса да бірліктерің бекем, татулықтарың тәтті, ырыстарың мен берекелерің мерекелі, шаңырақтарың биік,
түтіндерің түзу, мерейлерің үстем, көштерің көрікті болсын! Күннің жаманы өтеді, ниеттілеуің ақ, пейілің түзу болса, жақсылықтарың алда. Бір Аллам
ғана қолдасын, еш
жамандық болмасын, Қыдыр болсын жолдасың, үмітіңді ақтаң жалғасын,
шаңырағыңа бақыт орнасын, әумин!,-деп қымбатты әжеміз ақ батасын берді.
Кеген ауылындағы Елордамыздың күні мерекесі дәл осындай жанымызға жағымы ,
көңілімізге толымды оқиғамен жадымызда қалды. Әсілі, жақсылық деген жақсы. Қуаныш дегеннің орны бөлек. Шалғайда жатқан ел ішін осындай дүниелер
нұрландыра берсін! Ақ баталы әжелеріміз, ақ сақалды қарияларымыз, барша халқымыз аман да, есен болсын!

Қанат БІРЖАНСАЛ,
Кеген ауылы.