Мәртебесі асқақ білім ордасы

384

      Мынау өмірде білім нәрімен сусындатқан ұстаздарыңа, он жыл жылы құшағында жүрген мектебіңе жетер ештеңе жоқ?! «Мектеп – кеме, білім – теңіз» -деген қанатты сөз бекер айтылмаған. Мектеп қабырғасында жүріп асыл да асқақ арманның құшағында боласың. Мектептің құшағынан үлкен өмірге қанат қағасың. Қайда жүрсең де, қандай мамандық иесі болсаң да мектебің жаныңда, жадыңда тұрады. Өйткені, онда алаңсыз балалық шағың қалды. Азамат болып ат жалын тартып мінер кезің бастау алды. Сондықтан да қолыңа қалам ұстатқан ұстазың, үлкен өмірге жетелеген асыл жандарың, қымбатты мектебің ешқашан ұмытылмайды.

     Кеген ауданындағы Жалаңаш ауылына қарасты Ж. Ермегияев атындағы орта мектептің ұжымы, барша түлектері білім ордасының 100 жылдық торқалы тойын атап өтті. Шын мәнінде, алғашқы іргетасының қаланғанына бір ғасыр толып отыр. Сонау 1919 жылы алғашқы шәкірттеріне есігін ашқан мектептің тарихы терең, тағылымы кенен. Аудандағы мектептердің қарашаңырағы саналатын мектеп ғасырлық кезеңінде неше мыңдаған шәкірттерін түлетті. Оның ішінде осалы жоқ. Бір ғана мектептен он академик, екі министр, отыздан аса қоғам қайраткері, көптеген ақын-жазушылар шығыпты. Ақай Нүсіпбеков, Кеңес Нұрпейісов, Байынқол Қалиұлы, Телқожа Жанұзақов, Ешімбет Байбарақов, Нұрғали Мамыров, Ерғали Нүсіпұлы секілді академик ғалымдар, Ұзақ Бағаев, Мұқатай Жылқайдаров, Сапар Байжанов, Досан Жанботаев, Жақыпжан Нұрғожаев, Жанарбек Әшімжан секілді ақын-жазушылар,  Молдан Әлдербаев, Әріпбай Алыбаев, Қазтай Ұлтарақов, Тұрарбек Асанов, Зағипа Балиева, Серік Әбдірахманов секілді қоғам қайраткерлері  шыққан мектептің еңсесі биік, мәртебесі жоғары.

    Ғасырлық той мектептің алдына шырша көшетін отырғызудан басталды. Мәртебелі қонақтар  Ж.Ермегияевтің ескерткішіне гүл шоқтарын қойды. Содан кейін мектептің заманға лайық білім беретін сынып бөлмелерін, биыл ағымдағы жөндеуден өткізілген кітапханасын, мұражайын, спорт залын, мұғалімдер бөлмесін, шағын орталық  пен шеберханасын көрді.

        Мектептің мәжіліс залында 100 жылдыққа арналған ғылыми-әдістемелік конференция өрнегін тапты. Мектеп түлегі, ақын, республикалық «Ана тілі» газетінің бас редакторы,  мемлекеттік «Дарын» және Президент сыйлығының иесі Жанарбек Әшімжан жүргізген жиында  филология ғылымының кандидаты, ҚР Мәдениет саласының үздігі, ақын, журналист Жаңыл Асылбекова мектеп тарихы туралы тағылымды баяндамасын жасады. Мектептің бір түлегі, Кеген ауданының әкімі Талғат Байедилов, Қазақстанның Құрметті құрылысшысы, қоғам қайраткері Амангелді Ермегияев, медицина ғылымының докторы, профессор Әрмен Рысмендиев, мектептің түлегі,  Райымбек ауданының әкімі Нұржан Құдайбергенов, ҚР Білім беру ісінің озық қызметкері, ауданның Құрметті азаматы Нұржақып Сатанбаев, ҚР кино қайраткері, ҚР кино өнерінің үздігі, ауданның Құрметті азаматы Шаяхмет Имашев, еңбек ардагері, Жалаңаш ауылдық ақсақалдар алқасының төрағасы, ауданның Құрметті азаматы Әріп Сыбанбаев көпшілікті мерейлі тоймен құттықтап, жүрекжарды лебіздерін жеткізді.   

     Осы күні мектептің бір топ мұғалімдері марапатқа ие болды. Оны аудан әкімі Талғат Байедилов тапсырды. Жас ұрпақты оқыту мен тәрбиелеу ісіндегі елеулі жетістіктері үшін Ж. Ермегияев атындағы орта мектептің математика пәнінің мұғалімі Әбдіқасым Ыдырысов Ыбырай Алтынсариын атындағы медалмен марапатталды. Орта мектептің жанындағы шағын орталықтың аға тәрбиешісі Ғалия Мұсаева, биология пәнінің мұғалімі Зинат Ысқақова ҚР Білім және ғылым министрлігінің Құрмет грамотасымен, физика пәнінің мұғалімі Сәуле Өтегенова, орыс тілі мен әдебиеті пәнінің мұғалімі Роза Жақашева облыс әкімінің Құрмет грамотасына ие болды. Мектепте көп жыл еңбек еткен байырғы ұстаздар Нұржақып Өтегенұлы мен Нұрбапа Жүрінбайұлы облыс әкімінің Алғыс хатымен марапатталды.  Осы күні мектептің қазақ тілі мен әдебиеті пәнінің мұғалімі Асылхан Қуатбекова, математика пәнінің мұғалімі Гүлфариза Әміржанова  облыстық білім басқармасының Құрмет грамотасына ие болды.  Тарих пәнінің мұғалімі Дастан Әлиев Кеген ауданы әкімінің Құрмет грамотасымен марапатталды.

                  Жүз жылдық тойды Алматыдан келген  Тілеулес Құрманғалиев, Нұржан Жанпейісов, Мұрат Тоқашбаев секілді дәстүрлі әншілер, Қазақстанның еңбек сіңірген әртісі Сұлушаш Нұрмағанбетова, аудандық мәдениет үйінің әншісі Сәмиға Әлдекенова  әсем әндерімен ажарлады.  Кеген ауданы өнерпаздарынан құлған ұлт аспаптар оркестрі, өнер шеберлері Тақзия Сәулежан, Аслан Гумарлов, Нуриддин Оспановтар күймен көмкерді. Мектептің 100 жылдық мерейлі қуанышына орай спорттық жарыстар өткізілді.

                                                             Қанат БІРЖАНСАЛ,

                                                  Ж. Ермегияев атындағы орта мектеп,

                                                              Жалаңаш ауылы.