Кеген ауданына 90 жыл

851

Жанымызға ыстық жарқын мекен

Талғат БАЙЕДИЛОВ,
Кеген ауданының әкімі.

    Қайтадан қалпына келген туған ауданымыздың құрылғанына 90 жыл толды.  Бұл  ел мен жердің мерейі. Үлкен қуанышы. Жарқын да жайдары жақсылығы. Ауданымыз тарихи құндылығына толы өңір. Ұлы Жібек жолының бір тармағы өткен жер. Әйгілі Қарқара көтерілісі біздің аудан аумағында қазіргі Қарқара жайлауында тұтанғаны белгілі. Тәуелсіздік жылдарында «Ғасыр құрылысы» атанған Мойнақ су электр стансасы салынды. Әйгілі Шарын шатқалының сілемдері, бастаулары біздің қастерлі өлкеден арна тартады. Бүгінде жолдары жасалынған көрікті Көлсай алыс-жақын шетел туристер қызықтырып, сұлу да келбетті жеріміз сол арқылы әлемге танылуда. Жеріміз өсімдік пен жан-жануарлар әлеміне бай таиғаты көркем, суы мөлдір, ауасы тұнық мекен. Батыр бабаларымыз найзаның ұшы, білектің күшімен қорғап, жауынан аластап, ұрпағына аманаттап кеткен қастерлі де киелі топырақта 1928 жылдан бастап ауданымыздың іргетасы қаланған. Мұндағы жерлестеріміз өз тұстарында колхоздастыру кезеңін, алапат ашаршылықты, сұрапыл соғысты бір кісідей бастарынан өткерді. Талай-талай боздақтарымыз қуғын-сүргіннің құрбаны болды. Ұлы Отан соғысынан оралмай қалған жерлестеріміз қаншама?! Ауданымызды басқарған азаматтарымыздың бәрі қал-қадірлерінше ел мен жерді түлетуге атсалысты. Ұйымдастырушылық қабілеттерін көрсетті.    Тоқсан жылдың құшағында туған ауданымызды республикамызға, алыс-жақын шетелдерге танытқан айтулы ұлдарымыз, дара тұлғаларымыз аз болған жоқ. Біздің ауданнан Айтжан Түркебаев, Әубәкір Жүнісов, Ыдырыс Көшкінов, Әріпбай Алыбаев, Қазтай Ұлтарақов, Молдан Әлдербаев, Тұрарбек Асанов секілді көптеген қоғам және мемлекет қайраткерлері шықты. Қалдыбай Ыбырайымов секілді батыр жерлесіміз Даңқ орденінің толық иегері атанды. Біз ерен еңбектерімен танылған Жолсейіт Молдасанов, Ыдырыс Әбдіғұлов, Жақсылық Байбарақов, Мұқа Жарқынбасов, Іңкәрбек Жұмағұлов секілді онға тарта Еңбек Ерлерін лайықты мақтан етеміз. Ауданымыздың қасиетті топырағы Ақай Нүсіпбеков, Кеңес Нұрпейісов, Нұрғали Мамыров, Байынқол Қалиев секілді көптеген атақты академик ғалымдарды дүниеге әкелді. Ұзақ Бағаев, Мұқатай Жылқайдаров,  Сапар Байжанов, Досан Жанботаев, Жолдасбай Тұрлыбаев, Жанарбек Әшімжан секілді көптеген ақын-жазушылар өлкеміздің мақтанышы. Біз әрдайым Қазақстанның Халық Әртістері Есмұхан Обаев, Досжан Жанботаевпен, өнер тарландары Омар Қиқым, Тұрсынхан Қарақожаева, Нұрғанат Жақыпбаев, Рамазан Стамғазиев, Ермұрат Үсеновтермен қуанамыз, жұбанамыз. Айтуға тұрарлық, жазып көрсетуге жетерлік тұлғаларымыз аз емес. Тіпті оларды санауға саусағымыз жетпей жатады. Сондықтан табиғаты таңғажайып таулы өңірімізді батырлар мен ақындардың, ғалымдардың, қоғам қайраткерлерінің Отаны, мекені деп орнымен сөз етіп жатамыз.    Теңіз деңгейінен екі мың метрге дейін қоныстанған ауданымызда жақсылық мол, жаңалығы жетерлік. Биыл ауданның құрылғанына екінші жылға аяқ басты. Өңірімізде 12 ауылдық округ, жиырмадан аса ауылдарымыз бар. Қырық мыңға тарта халқымыз уақытқа сай тірліктерін жасап, өмір сүріп келеді. Соңғы жылдары аудан орталығынан заманауи емхана, музей, 280 орынды балалар бақшасы, спорттық-сауықтыру кешені, көптеген тұрғын үйлер салынды. Мектептеріміз бен мәдениет үйлеріміз күрделі жөндеуден өткізілді. Бірсыпыра ауылдарымызда тұрғын үймен біріктірілген полиция пунктерінің ғимараттары салынып, пайдалануға берілді. Тұрғындарымыз төрт түлік малдарын өсіріп, көбейтіп, дәнді дақылдары мен көкөністерін көктетіп, жағдайларын жақсарта түсуде. Ауылдардың арасындағы қатынас жолдары жасалып, таза ауыз сумен қамтамасыз ету жолға қойылған. «Елу жылда ел жаңа»-демекші, бүгінгі ауылдарымыздың шырайы кіріп, жағдайлары жақсарып, тұрмыстары түзеліп келеді.

    Бір сөзбен айтқанда, ауданымызда жаңа ғасырға лайықты жұмыстар жүргізіліп, шаруалар қолға алынуда. Дамыған заманға лайық өзгерістер орын алуда. Жанға жағымды жаңалықтар мол. Таулы ауданымызда Тұңғыш Президентіміз-Елбасы Н. Назарбаевтың «Болашаққа бағдар: рухани жаңғыру», «Ұлы даланың жеті қыры» секілді мақалалары аясында, мемлекетіміздің басшысы Қасым-Жомарт Тоқаевтың халқымызға арнаған алғашқы Жолдауына қатысты көптеген мәдени-көпшілік, спорттық және патриоттық тәрбиеге негізділген іс-шаралар өткізілуде. Бүгінгі жастарымыз білімді, белсенді. Туған мекендерін түлетіп жатқан түлектеріміз көп. Жастар жылы аясында атқарылып жатқан істер де баршылық. Ауданымыздың 9 айдағы әлеуметтік және экономикалық даму көрсеткіштері ойдағыдай. Барлық салалар бойынша жоспарларымыз орындалды. Күзгі науқан нәрлі нәтижелерімен қорытындыланды. Диқандарымыздың көңілдері тоқ. Ел-жұртымыз қатал қысқа дайындықтарын жасауда. Осындай шақта ауданның 90 жылдығы аталып өтуде. Бұл ғасырлық ғұмыр кешкен ақылман әжелер мен батагөй қарияларымыздың жасы іспетті. Бүгінгі ауданның да келбет, көркі, болашаққа бет бұрған көші қуантпай қоймайды. Туған аудан, өскен ортамыз үшін жасалар дүниелер, қолымызға алар шаруалар көп. Басымыз аман, бауырымыз бүтін болсын! Әрбір шаңырақта жақсылық, бақыт пен қуаныш арта түссін! Туған Отанымыздың, туған ауданымыздың мәртебесі биік, мерейі үстем бола берсін! Ауданымыздың ғасырлық тойында аман-есен жарқын жүзбен кездесейік!

Жақсылықтарға бастар ақ жол

Нұрбай Советовты
Кеген аудандық мәслихат хатшысы

Құрметті аудан тұрғындары! Табиғаты әсем заңғар биік таулармен айнала қоршалған, жасыл шыршалы Кеген ауданына 90 жыл толып отыр, мерекелеріңіз құтты болсын! Мемлекетіміз бен елдігіміздің күш- қуатын арттыруда тәуелсіздігіміз баянды болуы сіздердің сіңірген еңбектеріңіз айырықша екенін білеміз. Өткен ғасырда дүние есігін ашқан сәби, бүгінгі таңда ғасыр құрдасы атануда. Келешегі жарқын, болашағы айқын биікте көк байрағымыздың желбіреуі тәуелсіз еліміздің таңы нұрлы болуы, қазақ елінің ынтымақты, бірлікті ұстана білген намысты ұл- қыздарымыз бен үлгі тұтарлық үлкендеріміздің ұлы істері. Мәңгі ұрпақтан- ұрпаққа жалғаса береді. Небір қиын- қыстау кезеңдерді бастан өткерген шыдамы болаттай ерлерімізге басымызды иеміз. Мерекеміз меркеге жалғассын! Ауданымыздың 90 жылдығы жақсылықтарға бастар ақ жол болсын!

     Киелі топырақ

Жақыпжан Нұрғожаев,
Қазақстан Жазушылар Одағының мүшесі, ҚР мәдениет қайраткері.

 Мынау жарық дүниеге келген әр пенде үшін туған жерінен, елінен артық ештеңе жоқ. Туған жерің, өскен ортаң әрдайым жанарыңда, жүрегіңде мөлдіреп қана тұрады. Сол бір жаныңа ыстық, жүрегіңе жақын топырағыңның тек қана жақсылығын, мерейлі шаттығын көргің келеді. Өткен жылдардан бері Кеген ауданының қайта қалпына келгеніне, түлей түскеніне қуанып жүрмін. Менің қолыма қалам ұстатқан, қаламгерлік қабілет сыйлаған осынау таулы өңір. Оның сұлу табиғатына да тең келетін жер жаһанда жер жоқ?! Оның әрбір тасы мен түйір топырағы алтынға бергісіз. Біздің бабаларымызға, алдыңғы толқын ағаларымызға, қазіргі ел мен жұртымызға, алтын да ардақты жерлестерімізге сол қастерлі, киелі топырақта өмір сүру бақыты бұйырды. Сол басымызға бұйырған бақ пен бақыт ұзағынан сүйіндірсін! Көреріміз қуаныш, татарымыз бақыт болсын! Ауданымыздың 90 жылдық тойы құтты болсын!

Қуаныш ортақ

Есмұхан Обаев,
Қазақстанның Халық Әртісі.

Рас, қуаныш ортақ, жақсылық бір. Туған өлке десе, шығарда жанымыз бөлек. Естіп жатырмыз, көріп жатырмыз. Тұңғыш Президентіміз Н. Назарбаевтың Жарлығымен Кеген ауданы қайтадан қалпына келді. Туын тікті. Жүзін жарқыратты. Тамырына қан жүгіртті. Енді сол ауданның тізгінін ұстаған азаматтарымыз салиқалы іс, салмақты жұмыс жасап, ел мен жер үшін үлкен жұмыс жасай берсін! Қайда жүрсек те, ниетіміз бір, тілегіміз ортақ. Ауданның жүзі жарқын, айбыны асқақ, мәртебесі биік болса, біздің де мерейіміз үстем. Біз алыста жүрсек те туған жер туралы, жақсылығы туралы үнемі айтып жүреміз. Өлкеден шыққан дара тұлғаларымыз туралы әңгімелеп, сырт елдің алдында туған жердің бағасын көтеріп жүреміз. Ол орынды да. Келешек ұрпағының арасынан да білімді ұрпақ, өнерлі де өнегелі ұрпақ шыға берсін! Туған ауданымның тұғыры биік болсын! Той құтты болсын, жерлестер!