Лаура Мұхаметқали, фото Мира Мұраталиева.
Жуырдан аудандық мәдениет үйінде «Заң мен тәртіп» атты жастар форумы жоғары деңгейде ұйымдастырылып өтті. Ең алдымен орталық алаңда жас жеткіншектер мен жастар салауатты өмір салтын насихаттау мақсатында таңғы жаттығу мен флешмоб ұйымдастырылды. Шараның шымылдығын ашып, есірті қоғамға енген дер екенін аудандық мәдениет үйінің өнерпаздары қойылыммен сахналады. Аталған тағылымды шара – жас ұрпақтың құқықтық сауаттылығын арттыру, заңға деген құрметін қалыптастыру және азаматтық жауапкершілік сезімін нығайту мақсатында өткізілді.
Форумға аудан әкімдігі, құқық қорғау органдары, білім беру мекемелері, жастар ұйымдары мен бұқаралық ақпарат құралдарының өкілдері қатысты. Шара шымылдығы ресми түрде ашылып, жүргізушілер қатысушыларға жылы лебіздерін білдірді. Жастарға бағытталған мұндай бастамалардың маңыздылығы ерекше атап өтілді. Форумның басты ерекшелігі – түрлі сала мамандарының бас қосып, құқықтық мәдениетті дамыту жолдарын бірге талқылауы болды.
Форумға аудан әкімі Нұрбақыт Молдахметұлы Теңізбаев, Кеген ауданының прокуроры Данилов Алмат Әметжанұлы, Алматы облысы полиция департаментінің есірткі қылмысына қарсы іс-қимыл басқармасы полиция подполковнигі Темірғалиева Алтын, Алматы облысы полиция департаментінің өкілдері, сондай-ақ жастар саясаты мен психологиялық қолдау саласының мамандары болды.
Жиында алғашқы болып сөз алған аудан әкімі Нұрбақыт Молдахметұлы жастарға үлкен сенім білдіре отырып, ел болашағының заңға бағынатын, жауапкершілігі жоғары ұрпақтың қолында екенін атап өтті. Ол өз сөзінде қоғамдағы тәртіп пен тұрақтылықтың негізі – әр азаматтың заңды құрметтеуінде екенін ерекше жеткізді.
Келесі кезекте сөз алған прокуратура өкілі құқық бұзушылықтың алдын алу, жастар арасындағы заңсыз әрекеттердің себептері мен салдары туралы кеңінен баяндады. Сонымен қатар, құқықтық мәдениетті қалыптастыруда отбасы мен білім беру мекемелерінің рөлі зор екені айтылды.
Полиция қызметкерлері өз сөздерінде есірткі қылмысы мен киберқылмысқа қарсы күрестің бүгінгі таңдағы өзекті мәселелеріне тоқталып, жастарды зиянды әрекеттерден аулақ болуға шақырды. Цифрлық заманда интернет қауіпсіздігіне ерекше мән беру қажеттігі де назардан тыс қалмады.
Форум барысында жастар ұйымдарының жетекшілері мен психолог мамандар да өз ойларын ортаға салды. Олар жас буынның саналы әрі жауапты азамат болып қалыптасуында дұрыс бағыт-бағдар мен қолдаудың маңызын атап өтті.
Шараның маңызды бөлігі – сұрақ-жауап кезеңі болды. Жастар өздерін толғандырған сауалдарын қойып, сала мамандарынан нақты жауап алды. Бұл өз кезегінде форумның тек ақпараттық емес, тәжірибелік маңызы да жоғары екенін көрсетті.
Жалпы, «Заң мен тәртіп» атты жастар форумы – құқықтық мәдениетті нығайтуға бағытталған маңызды қадамдардың бірі болды. Мұндай игі шаралар жастардың санасын серпілтіп, елдің ертеңіне бейжай қарамайтын, заңды сыйлайтын саналы азамат тәрбиелеуге үлкен үлес қосары сөзсіз.
Қоғамның тыныштығы мен тұрақтылығы – әрбір азаматтың заңға деген құрметінен басталады. Ал саналы ұрпақ – жарқын болашақтың кепілі болмақ.
