ЖАҢА ШАҢЫРАҚ – ЖАРҚЫН БОЛАШАҚТЫҢ БАСТАУЫ
Қоныс құтты болсын!
ЖАҢА ШАҢЫРАҚ – ЖАРҚЫН БОЛАШАҚТЫҢ БАСТАУЫ
Көктемнің шуақты күндерімен бірге Кеген ауылында көптен күткен қуанышты сәт орын алды. Аудан орталығында жаңадан салынған тұрғын үйлердің кілтін табыстау рәсімі өтіп, бірнеше отбасының арманы ақиқатқа айналды. Бұл игі шара аудан тұрғындары үшін ғана емес, бүкіл өңір үшін маңызы зор, тарихи мәні бар қуанышты күндердің бірі болды.
Салтанатты шараға аудан басшылығы, ардагерлер, қоғам белсенділері мен ауыл тұрғындары қатысып, жаңа қоныс иелерінің қуанышына ортақтасты.
Баспана – әр отбасының ең асыл арманы, ең үлкен бақыты. Сол арманның орындалған сәтіне куә болған тұрғындардың жүзінен қуаныш пен ризашылық айқын сезілді. Мемлекет тарапынан жүзеге асырылып жатқан әлеуметтік бағдарламалардың нәтижесінде салынған жаңа үйлер бүгінде өз иелерін тауып, талай шаңыраққа шаттық сыйлады.
Шара барысында Кеген ауданының әкімі Нұрбақыт Молдахметұлы құттықтау сөз сөйлеп, тұрғындарды қуаныштарымен құттықтады. Өз сөзінде ол мемлекетіміздің әлеуметтік саясаты халықтың тұрмыс сапасын арттыруға бағытталғанын атап өтті. Мемлекет басшысы Қасым-Жомарт Кемелұлы Тоқаев өз Жолдауларында халықты қолжетімді тұрғын үймен қамтамасыз ету – мемлекеттік саясаттың басты басымдықтарының бірі екенін әрдайым айтып келеді. Бүгінгі игі бастама – сол тапсырмалардың жергілікті жерде нақты іске асып жатқандығының айқын дәлелі, – деді аудан әкімі.
Аудан басшысының айтуынша, Алматы облысы әкімдігінің қолдауымен Кеген ауданында әлеуметтік осал топтағы азаматтар мен тұрғын үй кезегінде тұрған отбасыларды баспанамен қамту жұмыстары жүйелі түрде жүргізілуде. Соның нәтижесінде соңғы алты жыл ішінде аудан бойынша 101 тұрғын үй пайдалануға берілген. Ал бүгінгі күні тағы да бірнеше отбасы жаңа қоныстың кілтін алып, қуанышқа кенелді. Бұл үйлер көпбалалы отбасылар мен әлеуметтік қолдауды қажет ететін азаматтарға арналған. Мемлекеттің халыққа деген қамқорлығының айқын көрінісі болып табылатын бұл игі іс ауыл тұрғындарының өмір сапасын арттыруға бағытталған маңызды қадамдардың бірі.
Аудан әкімі өз сөзінде жаңа үйлердің салынуына үлес қосқан мердігер ұйым – «Компания Строй индустрия» жауапкершілігі шектеулі серіктестігіне және оның жетекшісі Ахман Самат Қанатұлына алғысын білдірді.
Еліміздің дамуы мен халықтың әл-ауқатын арттыру жолында атқарылып жатқан әрбір игі іс – ел болашағына жасалған инвестиция. Осы үйлердің бой көтеруіне атсалысқан барлық азаматтарға аудан тұрғындарының атынан шынайы ризашылығымды білдіремін, – деді ол.
Салтанатты шара барысында жаңа баспананың кілттері иелеріне табысталып, қуаныш иелері өз ризашылықтарын білдірді. Жаңа үйдің табалдырығын аттаған әрбір отбасы үшін бұл күн – өмірлеріндегі ең бақытты сәттердің бірі екені анық.
Шараның келесі бөлігінде тұрғын үйлердің лентасын қию рәсімі өтіп, ақ жаулықты аналар шашу шашып, жаңа шаңырақтарға ақ тілектерін арнады. Аудан ақсақалдары бата беріп, қоныс иелеріне береке мен бірлік тіледі.
Қазақ халқында «Шаңырақ – ырыс қонатын орын» деген даналық сөз бар. Бүгінгі табысталған баспаналар сол ырыстың, береке мен бақтың бастауы болмақ. Жаңа үйлер тек тұрғындарға ғана емес, бүкіл ауылдың дамуына жаңа серпін береді. Өйткені әрбір салынған үй – ел болашағына салынған инвестиция, ауылдың өсіп-өркендеуінің белгісі.
Кеген ауданында әлеуметтік-экономикалық даму бағытында атқарылып жатқан жұмыстар мұнымен шектелмейді. Бүгінде өңірде жол жөндеу, ауызсу жүйелерін жаңарту, электр желілерін жаңғырту, білім беру мен денсаулық сақтау салаларын дамыту бағытында бірқатар ауқымды жобалар жүзеге асырылуда. Мұның барлығы – халықтың әл-ауқатын арттыруға бағытталған жүйелі жұмыстардың нәтижесі екені айқын.Салтанатты жиын соңында жаңа қоныс иелеріне ақжарма тілектер айтылып, әр отбасының шаңырағына шаттық пен береке тілінді.
Жаңа үй – үміттің шырағы, болашақтың бастауы. Ендеше Кеген ауылында бой көтерген жаңа шаңырақтар әрдайым шаттық пен берекеге толы болып, әр отбасының бақытына айнала берсін,- дестік.
Лаура Мұхаметқали.
