«Балаларға қызмет көрсететін ұйымдарды бақылаудың жаңа тәртібі туралы»
«Балаларға қызмет көрсететін ұйымдарды бақылаудың жаңа тәртібі туралы»
Алматы облысы Өңірлік коммуникациялар қызметінің ақпараттық алаңында өткен баспасөз мәслихатында балаларға қызмет көрсететін ұйымдарды бақылаудың жаңа тәртібі кеңінен түсіндірілді. Брифинг барысында Алматы облысының санитариялық-эпидемиологиялық бақылау департаментінің басшысы – Алматы облысының Бас мемлекеттік санитариялық дәрігері Марат Исмаилов баяндама жасады.
Спикердің айтуынша, 2025 жылғы 4 желтоқсанда Мемлекет басшысы балаларға қызмет көрсететін ұйымдарға қатысты мемлекеттік бақылауды күшейтуді көздейтін заңға қол қойған. Аталған өзгерістер 2026 жылғы 1 ақпаннан бастап күшіне енеді. Жаңа тәртіп мемлекеттік бюджеттен қаржыландырылатын мектептер, балабақшалар, сауықтыру лагерьлері мен медициналық ұйымдарға қолданылады.
Енді санитариялық-эпидемиологиялық бақылау ерекше тәртіппен, алдын ала ескертусіз жүргізіледі. Тексерулер жоспарлы және жоспардан тыс тексеру, тергеп-тексеру, сондай-ақ объектіге бару арқылы мониторинг форматында өтеді.
Жоғары тәуекел санатына балабақшалар, мектептер, интернаттар, балаларға арналған қоғамдық тамақтану орындары, денсаулық сақтау және сауықтыру ұйымдары жатқызылған. Ал эпидемиологиялық маңызы төмен объектілер орташа және төмен тәуекел тобына енгізіледі.
Сонымен қатар, жаңа заң аясында санитариялық талаптарды бұзғандарға қатысты тиісті шаралар қабылдау мүмкіндігі қарастырылған.
Марат Исмаиловтың сөзінше, бұл өзгерістер ең алдымен балалардың денсаулығы мен өмірін қорғауға, сондай-ақ ата-аналардың балалардың қауіпсіз ортада тәрбиеленіп, білім алуына деген сенімін арттыруға бағытталған.
Баспасөз мәслихаты барысында жаңа бақылау тетігі балаларға қызмет көрсететін мекемелерде санитариялық талаптардың қатаң сақталуын қамтамасыз ететіні атап өтілді.
