Медициналық пункт ашылды

Кеген ауданына қарасты Құрметі ауылында ауыл тұрғындары үшін аса маңызды әрі қуанышты оқиға орын алды. Жаңадан бой көтерген медициналық пункттің салтанатты ашылу рәсімі өтті. Бұл – ауылдың әлеуметтік-экономикалық әлеуетін арттырып, халықтың өмір сүру сапасын жақсартуға бағытталған игі істердің бірі.
Салтанатты шараға Кеген ауданының әкімі Нұрбақыт Молдахметұлы Теңізбаев, аудандық мекеме басшылары, қоғамдық ұйым төрағалары, БАҚ өкілдері, еңбек ардагерлері мен ауыл тұрғындары қатысты.
Медициналық пункттің ашылуы– ауыл тұрғындарының алғашқы медициналық көмекті уақытылы алуына, жалпы денсаулық сақтау қызметтерінің қолжетімділігі мен сапасын арттыруға септігін тигізеді. Ел Президентінің бастамасымен елімізде жүзеге асып жатқан “Ауыл – Ел бесігі” бағдарламасы аясындағы бұл нысан – соның нақты көрінісі.
Салтанатты жиын барысында ауыл тұрғыны, қоғам белсендісі Құдайбергенова Райгүл Кеңесбайқызы сөз алып, ауыл халқы атынан алғысын білдірді. Ол өзінің жүрекжарды тілегінде жаңа нысанның ауыл денсаулығын нығайту жолындағы маңызын атап өтіп, «Бұл – Құрметі жұртшылығы үшін көптен күткен қуаныш. Енді тұрғындар дер кезінде ем-дом алып, алысқа сабылмайтын болады», – деді.
Аудан әкімі Нұрбақыт Молдахметұлы да өз сөзінде бұл игі істің халық игілігіне қызмет ететініне сенім білдіріп, «Медициналық қызмет сапасының артуы – ауыл халқының әл-ауқатының артуына тікелей әсер етеді. Бұл – мемлекет тарапынан тұрғындарға жасалып жатқан нақты қамқорлықтың көрінісі», – деп атап өтті.
Жаңа медициналық пункт заманауи құрылғылармен жабдықталып, қажетті стандарттарға сай салынған. Мұнда алғашқы көмек көрсетуге, күндізгі стационарлық ем жүргізуге және алдын алу шараларын өткізуге барлық жағдай жасалған.
Құрметі ауылындағы жаңа медициналық пункт – тұрғындардың денсаулығын жақсартуға бағытталған маңызды әрі нақты қадам. Бұл мекеме – ауылдың әлеуметтік инфрақұрылымының нығаюына, елді мекеннің көркейіп, тұрғындардың тұрмыс сапасының артуына тағы бір үлес қосары сөзсіз.
Л. Қарасартова,
сурет: Қайнар ТАЛДЫБЕК.