Байсеркеде алғаш рет жаңа жылдық авиашоу өтеді
Байсеркеде алғаш рет жаңа жылдық авиашоу өтеді
Алматы облысының тұрғындары 2026 жылды ерекше қарсы алмақ. Биыл Байсерке аэродромында қысқы мереке мен әуе өнерін біріктіретін жаңа жылдық авиашоу өтеді. Әуеде қалықтап қойылым қоятын ұшақтар мен парашютшілер отбасылық мерекенің қиял-ғажайып атмосферасын арттыра түсетіні сөзсіз.
Бұл туралы Өңірлік коммуникациялар қызметінде өткен баспасөз мәслихатында облыстық туризм басқармасының басшысы Қуанышбек Мирамбекұлы, «Небо Байсерке» авиашоуының продюсері әрі бас директоры Аэлита Федорова және Қазақстан әуе спорты федерациясының вице-президенті, шоудың атқарушы директоры Тимофей Меркулов кеңінен айтып берді.
Іс-шара бағдарламасы кез келген жастағы көрерменге арналған. Әуе шарлары, ұшақ пен тікұшақты тізгіндеген ұшқыштардың әсерлі қойылымдары, мерекелік жәрмеңке, естелік суретке арналған фотозоналар, жарық инсталляциялары және концерт қонақтарды күтеді. Балалар үшін арнайы анимациялық алаңқайлар, қонақтарға ыстық сусындар ұсынылатын фуд-корт дайындалады.
— Көрермендердің қауіпсіздігі – бірінші орында. Бұл бағытта облыстық полиция департаменті, ТЖД және денсаулық сақтау басқармасы жұмыс істейді. Аэродром толық тексеруден өтіп, барлық талаптарға сай сертификатталған. Әр пилот ұшар алдында міндетті түрде медициналық тексеруден өтеді, — деді Қуанышбек Мирамбекұлы.
Іс-шара аумағында кіреберіс аймақтарын бақылау, медициналық пункттер мен мамандардың кезекшілігі ұйымдастырылады. Әсіресе ұшу бағдарламасының қауіпсіздігіне және парашютшілердің жұмысына ерекше назар аударылған. Қонақтардың жайлылығы үшін үш жылы шатыр орнатылады.
Жаңа жылдық авиашоу билеттері қазақстандық онлайн-платформада сатыла бастады. Балаларға (14 жасқа дейін) және зейнеткерлерге 50 пайыздық жеңілдік қарастырылған. Сондай-ақ отбасылық және топтық тарифтер де ұсынылады.
— Біз бұл шараға үлкен дайындықпен кірістік. Қонақтар бұрын-соңды көрмеген ерекше әуе қойылымдарын тамашалай алады. Әсіресе парашютшылардың арнайы құрастырылған жаңа жылдық композициясы – көрермен үшін тосын сый болмақ. Команда әр ұшу элементін нақтылап, қауіпсіз әрі әсерлі орындау үшін көп еңбектеніп жатыр, — деді ұйымдастырушылар.
