Алматы облысында мемлекеттік аудит нәтижесінде 23,9 млрд теңге көлемінде заңбұзушылықтар анықталды
Алматы облысында мемлекеттік аудит нәтижесінде 23,9 млрд теңге көлемінде заңбұзушылықтар анықталды
Алматы облысы өңірлік коммуникациялар қызметінің алаңында өткен баспасөз мәслихатында Алматы облысы бойынша Тексеру комиссиясының 2025 жылдың 9 айындағы қызметінің негізгі қорытындылары баяндалды. Спикер – Тексеру комиссиясының мүшесі Қуаныш Есенамановтың айтуынша, есепті кезеңде 8 тиімділік аудиті және 1 сараптамалық-талдамалық іс-шара жүргізіліп, барлығы 93 нысан қамтылған.
Мемлекеттік аудитпен қамтылған қаражат көлемі 197,4 млрд теңгені құрады, оның ішінде жергілікті бюджет қаражаты – 197,2 млрд теңге, республикалық бюджет есебінен – 221,1 млн теңге. Спикердің айтуынша, жүргізілген тексерулер нәтижесінде 23,9 млрд теңге көлемінде заңнама бұзушылықтар анықталған, бұл аудитпен қамтылған қаражаттың 12,1 пайызын құрайды. Бұл көрсеткіш өткен жылдың сәйкес кезеңімен салыстырғанда екі есеге жуық артқан.
Қуаныш Есенамановтың айтуынша, анықталған бұзушылықтардың ішінде:
9,1 млрд теңге – қаржылық бұзушылықтар. Бұл негізінен лауазымды тұлғалардың нормативтік актілер талаптарын сақтамауы, шарттық міндеттемелердің тиісті орындалмауы, артық жалақы мен сыйақы төлеу, іссапар шығындарын дұрыс есептемеу, бухгалтерлік есеп жүргізудегі қателіктер сияқты фактілермен байланысты.
399,2 млн теңге – тиімсіз пайдаланылған бюджет қаражаты. Бұл мемлекеттік мүлікті басқару қағидаларын сақтамау және бюджет қаражатын жоспарлау мен жұмсаудағы заң бұзушылықтармен байланысты.
14,3 млрд теңге – тиімсіз жоспарланған қаражат. Бұл бюджеттік өтінімдер мен есептердегі дәлсіздік, қызмет аймақтарын негізсіз кеңейту және қосымша ақы төлеуді тиімсіз жоспарлаудан туындаған.
Аудит қорытындысы бойынша қалпына келтіруге және өтеуге жататын жалпы сома 23,9 млрд теңге болған, оның 22,6 млрд теңгесі қалпына келтірілген. Қалдық ретінде қалпына келтірілмеген және өтелмеген 1,3 млрд теңге қаражат қалып отыр.
Бұзушылықтар бойынша 54 лауазымды тұлға тәртіптік, 155 адам әкімшілік жауапкершілікке тартылып, бюджетке 16,8 млн теңге айыппұл өндірілген. Сонымен қатар, қысқартылған өндіріс шеңберінде 8 лауазымды тұлғаға 1,6 млн теңге айыппұл салынған.
Спикердің айтуынша, аудит материалдарының негізінде 1 іс құқық қорғау органдарына, 2 іс прокуратураға жолданған. Ал бұған дейін жіберілген материалдар бойынша сот шешімімен 4 адам кінәлі деп танылып, әртүрлі мерзімге бас бостандығынан айырылған. Бұл іс Алматы облысының ауыл шаруашылығы басқармасындағы бұзушылықтармен байланысты болған.
«Мемлекеттік аудиттің басты мақсаты – қаржы тәртібін нығайту және бюджет қаражатын тиімді, ашық пайдалануды қамтамасыз ету. Бұл бағыттағы жұмыстар жүйелі түрде жалғасатын болады», – деді Қуаныш Есенаманов.
